אין די צייט וואס כלל ישראל איבער די גארער וועלט טוען אלע מעגליכע פעולות אפצושלאגן די שרעקליכע גזירה פון גיוס בני הישיבות וואס הויערט אויף אחינו בני ישראל בארץ הקודש, גרייט מען זיך אויף א היסטארישע אסיפת גדולי ישראל וואס וועט פארקומען מארגן מיטוואך אין ארץ ישראל, און וועט צונויפזאמלען צענדליגע גדולי ישראל פון אלע חסידישע קרייזן.
די גרויסע כינוס גדולי ישראל וועט פארקומען אין די פראכטפולע סקויה זאל אין מעלה החמישה, וואס געפונט זיך נישט ווייט פון ירושלים עיה"ק, עס איז ערווארטעט די פערזענליכע השתתפות פון די זקני גדולי הדור, די גרעסטע חסידישע רבי'ס לענגאויס ארץ ישראל, חברי מועצת גדולי התורה, און די גדולי ישראל החונים על דגל העדה החרדית בעיר ה' שמה.
אין די זעלבע צייט ווערט אויך געפלאנט א גרויסע אסיפה פאר ראשי הישיבות פון די ליטווישע קרייזן, וואס וועלן זיך צוזאמקומען דעם דאנערשטאג הבעל"ט איבער די אנגייענדע אנטוויקלונגען פון די גזירת הגיוס, די אסיפה ווערט פאררופן דורכ'ן זקן ראשי הישיבות הגאון הגדול רבי דוב לאנדא שליט"א ראש ישיבת סלאבאדקע.
