פארגאנגענעם דאנערשטאג איז פארגעקומען א פרייליכע מעמד יציקת היסודות אין עיר הבירה לאנדאן, אויפן שטח וואו עס ווערט געבויעט לשם ולתפארת די נייע גרויסע און פראכטפולע ביהמ"ד החדש דחסידי באבוב 45, ביים ווינקל פון די פארנומענע קלעפטאן קאממאן גאס און ברעידאן ראוד.
די בית המדרש ווערט געבויעט אין די יעצטיגע תקופה, אויפן שטח וואו עס איז געשטאנען די אלטע בנין ביהמ"ד פאר לאנגע יארן, און געווען דער תל תלפיות פאר חסידי באבוב 45 רבות בשנים. די בית המדרש איז איינקוואטירט אצינד אין א צייטווייליגע לאקאציע, ווען די בוי ארבעט גייט אן אין פולן שוואונג.
הגה"צ ר' יוסף אונגער שליט"א ראש ישיבה קטנה באבוב 45, בנו הגדול פון כ"ק אדמו"ר מבאבוב 45 שליט"א, איז געווען צוגאסט פארגאנגענע וואך אין שטאט לאנדאן, וואו ער האט געפראוועט א געהויבענע שבת הילולא קדישא אינאיינעם מיט די ארטיגע חסידים. דאנערשטאג איז פארגעקומען די מעמד יציקת היסודות ביים נייעם ביהמ"ד, אין שפיץ פונעם חשובן גאסט, וועלכער האט געגאסן יסודות, דערנאך זענען מכובד געווארן הרה"ג ר' ברוך חנה גרינפעלד שליט"א רו"מ בק"ק באבוב 45 לאנדאן, און הרה"ח ר' חיים שלמה גאלדמאן הי"ו דער יושב ראש וועד קרן הבנין. דערנאך איז פארגעקומען א מסיבת לחיים אינעם צייטווייליגן בית המדרש, וואו דער חשובער גאסט האט אויפגעטרעטן מיט א שיינע דרשה לכבוד המאורע.
