א היסטארישע געשעעניש האט זיך אפגעשפילט היינט נאכמיטאג אין ארץ ישראל, ווען דער זקן ראשי הישיבות ומנהיג עולם התורה, מרן הגאון הגדול רבי דוב לאנדא שליט"א ראש ישיבת סלאבאדקע, איז ארויסגעפארן ממעון תורתו אין בני ברק צו די מיליטערישע טורמע אין בית ליד, צו באזוכן ביי צוויי בחורי ישיבות וואס זענען אריינגעשליידערט געווארן אין טורמע פארן בלויזן חטא פון זיך נישט שטעלן צום מיליטער.
ווי באקאנט האט זיך ערווארבן אין די לעצטע פאר וואכן א גאר שטארקע קעגנערשאפט פון די עולם התורה והישיבות קעגן די רדיפות אויפן עולם התורה, ווען די ציוניסטישע מיליטער ווילן אריינשלעפן די תלמידי הישיבות צו דינען אין מיליטער, א זאך וואס איז ווי פארשטענדליך אפגעפרעגט ביי שלומי אמוני ישראל, און האט צוגעברענגט א מאסיווע מלחמה פון דאס גאנצע יהדות החרדית קעגן די דאזיגע פלענער.
נאך וואס עטליכע בחורים תלמידי הישיבות זענען ארעסטירט געווארן פארן בלויזן חטא פון זיך נישט שטעלן אין מיליטער, איז נעכטן נאכמיטאג פארגעקומען א דריגענדע אסיפה במעון תורתו פון הגאון הגדול רבי דוב לאנדא, וואו דער ראש ישיבה האט קלארגעשטעלט דעם דעת תורה אז מען גייט אונטערנעמען מאסיווע מחאות און ערנסטע שריט אפצושלאגן די שלעכטע גזירה.
היינט נאכמיטאג איז דער ראש ישיבה ארויסגעפארן פערזענליך באזוכן צוויי בחורים, צוויי ברידער רפאל און ברוך יצחקוב, וואס שמאכטן אין די מיליטערישע טורמע אין בית ליד, א וועג פון איבער א שעה צו פארן פונעם עיר התורה והחסידות בני ברק. דער ראש ישיבה האט זיך מטריח געווען בטירחא דגופא ובטירחא דגברא רבא, צו מחזק זיין די חשובע בחורים און קלארשטעלן אז די גאנצע יהדות החרדית וועט טון וואס מעגליך זיי ארויסצונעמען פון דארט, זיי זאלן נישט ווערן צובראכן און זיך האלטן שטארק.
הגאון הגדול רבי משה הלל הירש שליט"א ראש ישיבת סלאבאדקע איז אויך ארויסגעקומען מיט א שטארקע חיזוק פאר די תלמידי הישיבות, אין א פערזענליכע בריוו אדרעסירט צו די צוויי ברידער פון משפחת יצחקוב, דער ראש ישיבה הייבט אן דעם בריוו מיט די ווערטער "אשריכם שנתפסתם על דברי תורה", און אז זיי זענען די חלוצים בראש המחנה וואס האבן די זכות פון די גאנצע עולם התורה.
