די עולם התורה איז איינגעהילט אין טרויער און יתמות, מיטן הסתלקות לשמי מרום פון אחד המיוחד מגדולי מרביצי התורה בדורינו, הגאון הגדול רבי ברוך שמואל הכהן דויטש זצ"ל מראשי ישיבת קול תורה, און פון די פירנדע מנהיגי עולם התורה ביי די בני תורה קרייזן אין ארץ ישראל, וועלכער איז היינט נאכמיטאג אין ארץ ישראל נסתלק געווארן לגנזי מרומים, אין עלטער פון צוויי און אכציג יאר.
דער ראש ישיבה זצ"ל איז געווען דער עלטערער ברודער פון הגאון הגדול רבי אשר הכהן דויטש זצ"ל מראשי ישיבת פאנאוויטש, וועלכער איז נפטר געווארן מיט קארגע אכט חדשים צוריק, קינדער פון הגאון ר' בנימין זאב דויטש זצ"ל פון די נאנטע מקורבים ביי הגאון הגדול דער פאנאוויטשער רב זצ"ל. ער איז אויפגעוואקסן אין זיינע יונגע יארן בין כותלי ישיבת פאנאוויטש המעטירה, און פאר צענדליגע יארן נאכאנאנד מרביץ תורה געווען פאר תלמידים מיט גרויס איבערגעגעבנקייט.
זיין רייכע קאריערע פון הרבצת התורה האט זיך אנגעהויבן אין די טשעבינער ישיבה אין ירושלים, און פאר די לעצטע פינף און פערציג יאר איז ער געשטאנען אין שפיץ פון די בארימטע ישיבה קול תורה אין ירושלים, וואו ער האט אויפגעשטעלט טויזענטער תלמידים נאמנים, פארגעלערנט שיעורים בכל חדרי התורה, און געווען א מוסטער פאר די תלמידים מיט זיין געוואלדיגע התמדת התורה און בקיאות בתורה.
אין צוגאב צו זיין הרבצת התורה איז ער געשטאנען על המשמר אפצוהיטן דעם אש הגחלת שלא תכבה, געשטאנען פעלזן פעסט קעגן די נסיונות הדור און די נאכאנאנדע פרואוון פון די מעבירים על הדת צו אריינברענגען פשרות און אפמאכן מיט די בני תורה, ער האט לוחם געווען מלחמתה של תורה צו זיכער מאכן אז די בני תורה שטעלן זיך נישט אין מיליטער, און אויף סיי וועלכע פגעי הזמן עס האט זיך אויסגעפעלט.
ליידער איז ער נישט געזונט געווען די לעצטע פאר יאר, און היינט נאכמיטאג איז ער נפטר געווארן לחיי העולם הבא, איבערלאזנדיג א הערליכע דור פון חשובע קינדער תלמידי חכמים און מרביצי תורה.
די גרויסע לוויה וועט פארקומען היינט מאנטאג ביינאכט אין ארץ ישראל, עס וועט זיך אנהייבן אכט אזייגער אווענט פארנט פון זיין שטוב אויף רחוב סנהדריה המורחבת, און ער וועט קומען לקבורה אויפן הר המנוחות במעמד קהל רב.
וכל בית ישראל יבכו את השריפה אשר שרף ה'.
