א אייגענארטיגע מעמד איז פארגעקומען פארלאפענע וואך אין מושב אורה נעבן ירושלים עיה"ק, ווען אריבער טויזענט צעירי תלמידי חכמים פון די גורער מוסדות האבן זיך פארהערט אויף הונדערטער בלעטער גמרא בעל פה, פארנט פון די זקני גדולי האדמורי"ם בארץ הקודש, כ"ק אדמו"ר מגור שליט"א, און כ"ק אדמו"ר מוויזניץ שליט"א.
בחצר הקודש גור קומט כסדר פאר אזעלכע בחינות, ווען די תלמידים פארהערן זיך אויף הונדערטער בלעטער גמרא וואס זיי לערנען אין ראם פון מפעל "מזומנים" די גערער תורה רעוואלוציע, אצינד ווען עס איז געפלאנט געווארן אזא בחינה בפני הקודש פון כ"ק אדמו"ר מגור שליט"א, אין די צייט וואס דער רבי שליט"א האלט זיך אויף אין מושב אורה אויף אפרוה, האט דער רבי שליט"א געבעטן אז מען זאל לאדענען כ"ק אדמו"ר מוויזניץ שליט"א וועלכער האט זיך אויך אויפגעהאלטן אין מושב אורה אויף אפרוה.
די מעמד איז פארגעקומען דאנערשטאג ואתחנן אין א זאל אין מושב אורה, און אויפן וועג צום מעמד איז כ"ק אדמו"ר מגור שליט"א אנגעקומען אויף א באזוך במעון הנופש פונעם וויזניצער רבי'ן שליט"א, די צוויי רבי'ס האבן זיך פארשפארט א שטיק צייט און געשמועסט פריוואט, דערנאך זענען ביידע רבי'ס געפארן אינאיינעם צו באשיינען די מעמד, און דער וויזניצער רבי האט מיטגעהאלטן ווי די יונגע תלמידי חכמים ענטפערן די שאלות מיט א זעלטענע קלארקייט.
צווישן די לומדים זענען געווען פילע תלמידי חכמים וואס האבן זיך פארהערט אויף איבער טויזענט בלעטער גמרא, עס האט געדויערט ארום צוויי שעה, ווען דער וויזניצער רבי האלט מיט די ערשטע חלק. נאכן פארהער האט דער גערער רבי אנגעוואונטשן מברכות קדשו לכל העם הנאספים, און פארטיילט עפלעך פאר די חשובע עסקנים, ווען די קינדער פונעם רבי'ן פארטיילן עפלעך פאר אלע נבחנים. שפעטער איז פארגעקומען א פראכטפולע סעודת מצוה אין ירושלים עיה"ק.
