די העפטיגע מערכה וואס איז אקטיוו ביי אחינו בני ישראל בארץ הקודש אין רעזולטאט פון די שווערע גזירה פון גיוס בני הישיבות גייט ווייטער אן אין פולן שוואונג, איבערהויפט אין די יעצטיגע טעג ווען צוויי ישיבה בחורים זענען פארשפארט אין טורמע נומער צען פארן איינציגן חטא פון זיך נישט שטעלן צום מיליטער.
נאכפאלגענדיג די באזוך פון מרנן ורבנן גדולי התורה ביי די אסירי תורה, האט די פארוואלטונג פון די טורמע ארויסגעגעבן א פארארדענונג נישט אריינצולאזן קיין רבנים באזוכן, אין א פרואוו צו דערשטיקן דעם קול מחאה פון די חרדישע אידנטום, אבער ווי פארשטענדליך העלפט דאס נישט קיין סאך, נאך וואס עס קומט פאר נאכאנאנדע עצרות מחאה פארנט פון די טורמע ווען מאסן אידן קומען ארויס מוחה זיין כדת של תורה, און ארויסהייבן דעם וויי געשריי אויף די שרעקליכע רדיפת הדת און די בזיון התורה.
יעצט ביינאכט אין ארץ ישראל זענען אנגעקומען פארנט פון די טורמע א צאל גדולי אדמורי"ם ורבנים, צווישן זיי כ"ק אדמו"ר מראחמיסטריווקא שליט"א, כ"ק אדמו"ר מזוועהיל שליט"א, כ"ק אדמו"ר מסקולען שליט"א פון ירושלים, הגה"צ ר' הערשל ראטטענבערג שליט"א רב חסידי גור אין אמעריקע, הגה"צ ר' דוד משה ראזענבוים שליט"א אב"ד קרעטשניף רחובות, בנו הגדול פון כ"ק אדמו"ר מקרעטשניף שליט"א, און נאך פילע טויזענטער אידן וואס קומען כסדר צו לאזן הערן דעם קול מחאה, און מתפלל זיין מיט א כח הרבים ברחובה של עיר לביטול רוע הגזירה.
מארגן מיטוואך איז געפלאנט א גרויסע עצרת מחאה אין שפיץ פון כ"ק אדמו"ר מקארלין סטאלין שליט"א אינאיינעם מיט הונדערטער חסידים.
