מיט גרויס צער און טרויער ווערט אויפגענומען די שווערע בשורה איבער די פטירה פון הרבנית הצדיקת מווייטצען וומס"ב ע"ה, אשת חבר הגה"צ רבי דוד דוב מייזליש שליט"א אבד"ק ווייטצען אין וויליאמסבורג, און טאכטער פון כ"ק אדמו"ר הרה"ק רבי דוד משה מקרעטשניף זי"ע, וועלכער איז היינט צופרי נפטר געווארן אין עלטער פון צוויי און זיבעציג יאר, נאכן זיך מוטשענען מיט די ביטערע מחלה ה"י די לעצטע יאר צייט.
די רעבעצין הרבנית שפרה טויבא מייזליש ע"ה איז געווען די פיפטע קינד פון הרה"ק מקרעטשניף זי"ע, און אלס יונג מיידל איז זי ליידער פאריתומ'ט געווארן פון איר גרויסן פאטער, וועלכער איז אוועקגעריסן געווארן אין א יונגן עלטער ווי באקאנט. איר מאן דער רב שליט"א איז דער עלטסטער זון פון הגה"צ ר' יוסף משה מייזליש זצ"ל אבד"ק ווייטצען וומס"ב, זון פון הגה"ק בעל בנין צבי מווייטצען זי"ע, וועמענס שיינע המשכה ער זעצט פאר אין דעם שיינעם חסידישן בית המדרש קהל ווייטצען אויף בעדפארד עוועניו אין וויליאמסבורג.
די רעבעצין ע"ה לאזט איבער א הערליכע דור, חשובע קינדער און אייניקלעך זרע ברך ה', תלמידי חכמים און מרביצי תורה, די לוויה וועט פארקומען היינט זונטאג מיטאג איינס דרייסיג, ביי ביהמ"ד ווייטצען אויף 549 בעדפארד עוועניו אין וויליאמסבורג, און זי וועט קומען לקבורה אויפן בית החיים אין ניו דזשערזי, בחלקת משפחתה החשובה.
אויסער איר הערליכע דור האט די רעבעצין פאראבל'ט אירע חשובע געשוויסטער אדמורי"ם ורבנים מפורסמים, די עלטסטע ברודער כ"ק אדמו"ר מקרעטשניף שליט"א, וועלכער וועט זיצן שבעה בביתו נאוה קודש אין קרית קרעטשניף רחובות, כ"ק אדמו"ר מפרימישלאן שליט"א, כ"ק אדמו"ר מקרעטשניף מאנסי שליט"א, הרבנית מסאסוב תליט"א, הרבנית מפאלטישאן תליט"א, הרבנית מדזיקוב מאנסי תליט"א, און הרבנית משענדישוב תליט"א.
דאס איז אויסער עטליכע געשוויסטער וועלכע זענען שוין ליידער נפטר געווארן אין די לעצטע פאר יאר, כ"ק אדמו"ר מקרעטשניף קרית גת זצ"ל, כ"ק אדמו"ר מביטשקוב זצ"ל, הרה"צ ר' יצחק ראזענבוים ז"ל, און הרבנית מקאליש בית שמש ע"ה.
