היינט קומט פאר א גרויסארטיגע עצרת מחאה און מאסן פיקעטינג ברחובות מאנהעטן, בפקודת הקודש פון כ"ק אדמו"ר מסאטמאר שליט"א, אין ליכט פון די שרעקליכע רדיפת הדת בארץ הקודש מיטן אינפארסירן די גזירה פון גיוס בני הישיבות רח"ל.
היינט קומט פאר די יערליכע זוממער דינער לטובת אירגון שיעורי תורה, אין זאל פון יאנג איזריעל אויף עוועניו קעי אין פלעטבוש, אין שפיץ פון חשובע רבנים.
כ"ק אדמו"ר מבוהוש שליט"א לאזט זיך היינט ארויס אויף א מסע הקודש צום שטאט קערעסטיר אין אונגארן, אינאיינעם מיט א קבוצה חסידים תומכי מוסדות בוהוש, וואו מען וועט פוקד זיין דעם ציון הק' פונעם הייליגן צדיק רבי ישעי'לע קערעסטירער זי"ע, און דעם ציון הק' פונעם הייליגן ישמח משה אין אוהעל, הרה"ק בעל אך פרי תבואה זי"ע אין ליסקא, און הרה"ק רבי אייזיק'ל קאלובער זי"ע.
כ"ק אדמו"ר מוויזניץ שליט"א פון בארא פארק וועלכער האלט זיך אויף די טעג אויף א מסע הקודש צו די מקומות הקדושים אין אייראפע, וועט היינט אנקומען צו די קברי אבות אין אוקראינע, דעם ציון הק' פון צדיקי בית קאסוב און וויזניץ, און די ציון הק' פונעם הייליגן רוזינער זי"ע אין שטאט סאדיגורא.
היינט כ"ד אב געפאלט די יומא דהילולא קדישא פון כ"ק אדמו"ר מקאליש זצ"ל, די קינדער כ"ק האדמורי"ם שליט"א וועלן ארויפגיין צום ציון הק' אויפן מאנסי בית החיים היינט נאכמיטאג, און שפעטער פארנאכטס אפרעכטן די יארצייט טיש אין זאל פון ביהמ"ד שערי תורה אין פלעטבוש.
שמחת בית סקווירא: היינט קומט פאר די שמחת השבע ברכות פון א אור אייניקל ביי כ"ק אדמו"ר מסקווירא שליט"א, אייניקל פון זיין איידעם כ"ק אדמו"ר מראחמיסטריווקא שליט"א פון מאנסי, די כלה א טאכטער פון זיין איידעם הרב צבי אלימלך טווערסקי שליט"א, מיט די חתן א זון פון הרב שמעון דוב טווערסקי שליט"א, זון פון כ"ק אדמו"ר מלויעוו טשערנאביל פארשעי שליט"א. – די שמחת השבע ברכות קומט פאר בביתו נאוה קודש פון כ"ק אדמו"ר מסקווירא שליט"א, געאייגענט פאר די צענדליגע שליחים פונעם רבינ'ס קאסע מפעל שקל הקודש.
שמחת בית ווערדאן: היינט קומט פאר די שמחת השבע ברכות פונעם חתן א זון פון כ"ק אדמו"ר מווערדאן שליט"א פון ירושלים, איידעם ביי כ"ק אדמו"ר ממישקאלץ שליט"א פון פ"ת, מיט די כלה א טאכטער פון הרה"ג ר' משה לאבין שליט"א רב ביהמ"ד עטרת צבי זידטשויב אין בני ברק. – די שמחת השבע ברכות קומט פאר אין זאל שמחת ירושלים אויף רחוב פישל אין ירושלים.
היינט קומט פאר די שמחת החתונה פונעם חתן א זון פון כ"ק אדמו"ר מפאריסוב שליט"א פון ירושלים, איידעם ביי כ"ק אדמו"ר מטעמעשוואר נדבורנא פ"ת זצ"ל, מיט די כלה א טאכטער פון הרב חיים מרדכי געשטעטנער שליט"א, איידעם ביי כ"ק אדמו"ר מקארלין לעלוב זצ"ל. – די שמחת החתונה קומט פאר אין זאל היכלי מלכות אין בני ברק.
היינט קומט פאר די מעמד הנחת תפילין פון א אייניקל ביי כ"ק אדמו"ר מסערט וויזניץ שליט"א, א זון פון זיין זון הגה"צ ר' יחיאל יהושע האגער שליט"א, איידעם ביי כ"ק אדמו"ר ממודזיץ שליט"א, די הנחת תפילין קומט פאר אין ביהמ"ד הגדול אין רמת וויזניץ חיפה, נאכגעפאלגט מיט א מסיבת לחיים נאכן דאווענען, די סעודת הבר מצוה וועט פארקומען קומענדיגע וואך זונטאג.
אריינצושיקן מודעות און נייעס, שיקט אן אימעיל צו NEWS@JDNMAIL.COM
