לרגל די צווייטע יומא דהילולא קדישא פון כ"ק אדמו"ר הרה"ק מראחמיסטריווקא זי"ע וואס געפאלט בעצם יום השבת קודש כ"ט אב, וועלן די קינדער כ"ק מרנן האדמורי"ם מראחמיסטריווקא שליט"א פראווענען א גרויסע שבת בצוותא חדא בבית מדרשו פונעם בעל ההילולא, ביהמ"ד הגדול ראחמיסטריווקא אין בארא פארק, מיט די באטייליגונג פון פילע חסידים פון נאנט און ווייט. שבת אינדערפרי וועט פארקומען די צענטראלע סעודת הילולא וסיום הש"ס אין שפיץ פון אלע רבי'ס, בהיכל ביהמ"ד הגדול ראחמיסטריווקא.
דעם שבת כ"ט אב געפאלט די יומא דהילולא קדישא פון כ"ק אדמו"ר הרה"ק בעל נועם אליעזר מסקולען זי"ע, די אייניקלעך כ"ק האדמורי"ם מסקולען שליט"א וועלן פראווענען די טישן ברוב עם לכבוד די יארצייט, און מוצאי שבת אפרעכטן די סעודות מלוה מלכה ברוב עם הדרת מלך. כ"ק אדמו"ר מסקולען שליט"א וועט מוצאי שבת קודש אנקומען קיין וויליאמסבורג, און אפרעכטן די יארצייט טיש בבית מדרשו של רבי אויף קיעפ סטריט, אינאיינעם מיטן ברודער כ"ק אדמו"ר מישועת יעקב סקולען שליט"א.
כ"ק אדמו"ר מסקווירא שליט"א איז צוגאסט אויף דעם שבת אין קרית סקווירא אין בעטהעל ניו יארק, צום היסטארישען חגיגת חנוכת הקריה פון די נייע שטעטל וואס דער רבי שליט"א שטעלט אויף אלס המשכה צום סקווירא שטעטל שיכון סקווירא, אינאיינעם מיטן רבי'ן וועלן וויילן אויף שבת אין די נייע שטעטל די תושבי הקריה, און א קבוצה נכבדה נדיבי לב וואס לאזן זיך קאסטן גרויסע געלטער פארן התייסדות הקריה.
כ"ק אדמו"ר מפשעווארסק שליט"א וועלכער וויילט אין ניס פראנקרייך דורכאויס די זוממער וואכן, וועט פראווענען דעם שבת ערב ראש חודש אלול אינאיינעם מיט א קבוצה נכבדה נגידים ושועים, תומכי קרן הבנין פון די נייע פשעווארסקער בית המדרש אין אנטווערפן.
כ"ק אדמו"ר מבאבוב 45 איז צוגאסט אויף דעם שבת אין מחנה ישיבה קטנה ד'באבוב 45 אין ווייט לעיק.
כ"ק אדמו"ר מתולדות אהרן שליט"א איז צוגאסט אויף דעם שבת אין קערעסטיר אין אונגארן, בביתו נאוה קודש פון הרה"ק רבי ישעי'לע קערעסטירער זי"ע.
כ"ק אדמו"ר מקאסוב שליט"א וועלכער איז צוגאסט די טעג אין ירושלים עיה"ק, וועט פראווענען דעם שבת אין ביהמ"ד מקור ברוך דחסידי סערט וויזניץ, בנשיאות חותנו כ"ק אדמו"ר מסערט וויזניץ שליט"א.
כ"ק אדמו"ר מאנטוניא שליט"א איז צוגאסט אויף דעם שבת אין שטאט אלעד, לרגל די שמחת האויפרוף פון א אייניקל, די חתן א זון פון זיין איידעם הרה"ג ר' שלמה צבי גרינבערגער שליט"א רב דקהל אהבת שלום וויזניץ אין אלעד. די תפילות און טישן קומען פאר אין ביהמ"ד אהבת שלום וויזניץ אין אלעד.
כ"ק אדמו"ר מתולדות יהודה סטוטשין שליט"א איז צוגאסט אויף דעם שבת אין ירושלים עיה"ק, די תפילות און טישן קומען פאר אין די גרויסע שאטער אויף רחוב מנחת יצחק.
הגה"צ אבד"ק פאפא מאנסי שליט"א בן כ"ק אדמו"ר מפאפא שליט"א וועלכער איז צוגאסט די טעג אויף א נסיעה צו די מקומות הקדושים אין אייראפע אינאיינעם מיט די חברי הקהילה, כהכנה דרבה לקראת די ימים הנוראים, וועט פראווענען דעם שבת אין שטאט ליזענסק אין פוילין, סמוך ונראה צום ציון הק' פונעם הייליגן רבי'ן ר' אלימלך זי"ע.
כ"ק אדמו"ר מוויזניץ שליט"א וויילט דעם שבת אין מושב אורה אויף אפרוה.
כ"ק אדמו"ר מסאטמאר שליט"א וויילט דעם שבת אין מחנה דברי יואל ד'סאטמאר אין סוואן לעיק אויף אפרוה.
כ"ק אדמו"ר מבאבוב שליט"א וויילט דעם שבת אין ווייט לעיק אויף אפרוה.
כ"ק אדמו"ר מפאפא שליט"א וויילט דעם שבת אין קרית פאפא וועסטשעסטער אויף אפרוה, בקרב תלמידי הישיבה.
כ"ק אדמו"ר מוויזניץ שליט"א וויילט דעם שבת אין מאלויע שווייץ אויף אפרוה.
כ"ק אדמו"ר מדושינסקיא שליט"א וויילט דעם שבת אין וועסט פאלם ביעטש פלארידע אויף אפרוה.
כ"ק אדמו"ר מוויען שליט"א וויילט דעם שבת אין מחנה מתיבתא נחלת יעקב וויען אין לאק שעלדרעיק, אינאיינעם מיט די תלמידי הישיבה.
כ"ק אדמו"ר מוויזניץ שליט"א פון וויליאמסבורג וויילט דעם שבת אין מחנה אהבת ישראל וויזניץ אין ליבערטי. בצל הקודש וועט וויילן דעם רבינ'ס ברודער כ"ק אדמו"ר מוויזניץ שליט"א פון לאנדאן, וועלכער איז צוגאסט די טעג אין אמעריקע, און וועט אפרעכטן די תפילות און טישן בצוותא חדא.
כ"ק אדמו"ר מוויזניץ שליט"א פון בארא פארק וויילט דעם שבת אין מחנה בנות ישראל וויזניץ אין סאוט פאולסבורג.
כ"ק אדמו"ר מתולדות צבי ספינקא שליט"א וויילט דעם שבת אין קרית יואל אויף אפרוה, די תפילות און טישן קומען פאר בבית מדרשו אויף טעטש קאורט.
כ"ק אדמו"ר מקאשוי שליט"א וויילט דעם שבת אין מחנה ברכת שמים קאשוי אין אלסטערהייטס, אינאיינעם מיט די תלמידי הישיבה.
כ"ק אדמו"ר מצעהלים שליט"א וויילט דעם שבת אין מחנה ערוגת הבושם צעהלים אין סאוט פאולסבורג.
כ"ק אדמו"ר מצאנז זוועהיל שליט"א וויילט דעם שבת אין מחנה דברי חיים אין קאניאנגא לעיק.
שמחת בית אמשינוב – מאקאווא: עס איז געשלאסן געווארן די שידוך פונעם חתן א זון פון כ"ק אדמו"ר מאמשינאוו בית שמש שליט"א, איידעם ביי הגה"צ ר' אהרן מענדלזון שליט"א, זון פון הגה"צ גאב"ד קוממיות זצ"ל, און איידעם ביי כ"ק הגה"צ גאב"ד מאקאווא שליט"א, מיט די כלה א טאכטער פון הגה"צ ר' עקיבא קליין שליט"א, זון פון הגה"צ אבד"ק וואשארהעלי זצ"ל, און איידעם ביי כ"ק אדמו"ר מאמשינוב שליט"א.
שמחת בית תולדות אברהם יצחק – קאלוב – זידטשויב: דעם שבת קומט פאר די שמחת האויפרוף פון א אור אייניקל ביי כ"ק אדמו"ר מתולדות אברהם יצחק שליט"א, אייניקל פון זיין איידעם הגה"צ ר' אליעזר צבי טויב שליט"א אב"ד קאלוב ביתר, זון פון כ"ק אדמו"ר מקאלוב שליט"א, די חתן א זון פון זיין איידעם הרב יואל טייטלבוים שליט"א, זון פון הגה"צ אבד"ק נעפלעמיץ שליט"א, מיט די כלה א טאכטער פון הגה"צ ר' בעריש שנעעבאלג שליט"א, זון פון כ"ק אדמו"ר מזידטשויב שליט"א פון בני ברק. – די שמחת האויפרוף קומט פאר אין ביהמ"ד הגדול תולדות אברהם יצחק אין ירושלים.
שמחת בית סטריקוב: דעם שבת קומט פאר די שמחת האויפרוף פון א אייניקל ביי כ"ק אדמו"ר מסטריקוב שליט"א, די חתן א זון פון זיין איידעם הגה"צ ר' יחזקאל שלום בלום שליט"א, זון פון הגה"צ ר' בנציון בלום שליט"א דומ"ץ באבוב לאנדאן, מיט די כלה א טאכטער פון הרב יצחק האגער שליט"א, זון פון הגה"צ ר' אביש האגער שליט"א ראש כולל פאפא ירושלים, און איידעם ביי הגה"צ ר' אהרן אלי' פעלדמאן שליט"א, איידעם ביי הרה"ק בעל ברכת משה מסערט וויזניץ זצ"ל. – די שמחת האויפרוף קומט פאר אין ביהמ"ד סטריקוב אין בני ברק.
שמחת בית טאלנא – אסטראוו קאלושין: דעם שבת קומט פאר די שמחת האויפרוף פון א אייניקל ביי כ"ק אדמו"ר מטאלנא שליט"א, די חתן א זון פון זיין איידעם הגה"צ ר' נפתלי ארי' שפיגל שליט"א אבד"ק אסטראוו קאלושין ירושלים, זון פון כ"ק אדמו"ר מאסטראוו קאלושין סידערהויסט שליט"א, מיט די כלה א טאכטער פון הגה"צ ר' ישראל שווארץ שליט"א ראה"כ צאנז ביתר, זון פון הגה"צ ר' חיים יעקב שווארץ זצ"ל דומ"ץ קרית צאנז נתני'. – די שמחה קומט פאר אין ביהמ"ד אסטראוו קאלושין אין ירושלים. – דער זיידע כ"ק אדמו"ר מאסטראוו קאלושין שליט"א איז אנגעקומען צוגאסט קיין ארץ ישראל לכבוד די שמחה.
שמחת בית ספינקא: דעם שבת קומט פאר די שמחת האויפרוף פון די חתן א זון פון כ"ק אדמו"ר מספינקא רמת אהרן שליט"א, מיט די כלה א טאכטער פון הרה"ג ר' נחמן ראזנער שליט"א אב"ד ראשית חכמה ירושלים. – די שמחת האויפרוף קומט פאר אין בנין ישיבת בית שמעי' אויף רחוב פוברסקי אין בני ברק.
דעם שבת קומט פאר די שמחת האויפרוף פון א אייניקל ביי הגה"צ אבד"ק אשוי שליט"א, די חתן א זון פון זיין איידעם הגה"צ ר' מרדכי כהנא שליט"א, זון פון הגה"צ ר' אברהם כהנא שליט"א מספינקא בית שמש, מיט די כלה א טאכטער פון הגה"צ ר' יואל האלפערט שליט"א, זון פון הגה"צ ר' שלום האלפערט שליט"א, און איידעם ביי כ"ק אדמו"ר מתפארת יחזקאל שליט"א. – די שמחה קומט פאר אין ביהמ"ד אשוי אין קרית יטב לב בלומינגבורג.
דעם שבת קומט פאר די מעמד הכנסת ספר תורה וואס ווערט אריינגעגעבן דורך כ"ק אדמו"ר מנדבורנא צפת שליט"א, לבית מדרשו קהל נזר הקודש באניא נאדווערנא אין עיה"ק צפת.
אריינצושיקן מודעות און נייעס, שיקט אן אימעיל צו NEWS@JDNMAIL.COM
