בחצר הקודש מאחנובקא בעלזא האט מען אין די יעצטיגע טעג באנייעט די אונטערשטע שטאק פונעם בנין בית המדרש הגדול, וואו עס איז געווארן אהערגעשטעלט א צאל שטיבלעך צום דאווענען מיט קביעות'דיגע מנינים, און נאך פארשידענע איינריכטונגען לרווחת הציבור, דורכאויס די וואכן טעג ווען מ'דאווענט אין די מנינים, און אויך שבת און יעדע געלעגנהייט.
לכבוד די באנייאונג איז פארגעקומען א מעמד קביעת מזוזה און חנוכת הבית, דאנערשטאג נאכט פרשת עקב. כ"ק אדמו"ר ממאחנובקא בעלזא שליט"א האט קובע געווען די מזוזה ביי איין שטיבל, און מכבד געווען די חשובי העדה צו קובע זיין די אנדערע מזוזות, דער רבי האט זיך אומגעקוקט אויפן גאנצן שטאק און דערנאך געדאווענט מנחה אין די צענטראלע וואכעדיגע בית המדרש דארט ביי די שטיבלעך.
דאן איז פארגעקומען א מסיבת לחיים לרגל המאורע, דער רבי האט פארטיילט לעקאך און געוואונטשן לחיים, און זיך אויפגעשטעלט אויף א פרייליכע טאנץ. דערנאך איז פארגעקומען א ספעציעלע סדר לימוד צו באנייען דעם הייליג פלאץ מיט תורה ותפילה.
