טויזענטער אידן איבער די וועלט באוויינען די ביטערע אבידה, מיט די פטירה פונעם גדול המקובלים הגאון הצדיק רבי אלטר דוד חיים שטערן זצ"ל, מזקני המקובלים אין ארץ ישראל, און פון די גדולי הדור אינעם עיר התורה והחסידות בני ברק, וועלכער איז היינט פארטאגס נפטר געווארן לגנזי מרומים אין עלטער פון דריי און ניינציג יאר.
דער גאון איז געווען א זון פון הרב ישראל זכרי' שטערן ז"ל, און א איידעם ביי הגאון הצדיק ר' חיים משה מאנדל זצ"ל. געבוירן איז ער אין שטאט סערדאהעלי און איז שפעטער ארויפגעקומען קיין ארץ ישראל, אלס בחור האט ער געלערנט אין די בארימטע ישיבת חכמי לובלין, אין די פאנאוויטשע ישיבה און אין ישיבת חברון. ער איז געווען פון די נאנטע תלמידים ביי הגאון רבי יחזקאל לעווינשטיין זצ"ל, און זוכה געווען נהנה צו זיין מזיו אורו פונעם הייליגן חזון איש זי"ע.
אלע יארן איז ער געווען באקאנט מיט זיין צדקות ופרישות, זיין בקיאות בתורת הקבלה און הרבצת התורה, ער האט אסאך עוסק געווען ארויסצוהעלפן אידישע קינדער בעת צר, געשאפט און פארטיילט מיליאנען דאללארן פאר נויטבאדערפטיגע משפחות, מעמיד געווען תלמידים לאלפים, געוואונטשן ברכות פאר אידישע קינדער וואס זענען מקוים געווארן במלוא מובן המילה, און געפראוועט מופתים אויף א אפענע פארנעם.
ליידער איז ער נישט געזונט געווען די לעצטע תקופה, און היינט פארטאגס איז ער נפטר געווארן לחיי העולם הבא אין די לניאדו שפיטאל אין קרית צאנז נתני', איבערלאזנדיג א הערליכע דור פון חשובע קינדער און אייניקלעך רבנים און מרביצי תורה. די לוויה איז פארגעקומען היינט מיטאג פארנט פון זיין שטוב אויף רחוב סוקולוב אין בני ברק, און ער איז געקומען לקבורה אויפן פאנאוויטשער בית החיים.
