דריי גדולי הדור, מפארי ראשי הישיבות אין אמעריקע, זענען היינט ארויסגעפארן בטירחא דגברא רבא אויף א געמיינזאמע זיצונג אינעם אמעריקאנעם הויפטשטאט "וואשינגטאן די סי", צו שתדל'ן פונדערווייטנס לביטול רוע הגזירה פון גיוס בני הישיבות, וואס הויערט אויף אחינו בני ישראל בארץ הקודש.
אין די סאמע וויכטיגסטע טעג פון די יאר, צום אנהייב פון די פרישע אלול זמן בהיכלי הישיבות הקדושות, האבן די גדולי ראשי הישיבות צוגעמאכט די גמרא און ארויסגעפארן אין וועג, זייענדיג אן עת לעשות לה', זייענדיג מקיים דעם הפרו תורתך. די דריי גדולי הדור זענען הגאון הגדול רבי ארי' מלכיאל קאטלער שליט"א ראש ישיבת בית מדרש גבוה ד'לעיקוואד, הגאון הגדול רבי אהרן פעלדמאן שליט"א ראש ישיבת נר ישראל אין באלטימאר, און הגאון הגדול רבי אליהו חיים בראדני שליט"א ראש ישיבת מיר אין פלעטבוש.
די ציהל פון די באגעגעניש איז געווען א פריוואטע זיצונג מיטן מדינת ישראל אמבאסאדער אין אמעריקע, יחיאל לייטער, און איז אראנדזשירט געווארן דורך העסקן המפורסם ר' שלמה ווערדיגער הי"ו יושב ראש אגודת ישראל אין אמעריקע.
די גדולי הדור האבן אונטער פארמאכטע טירן אראפגעלייגט די קלארע דעת תורה און די פעלזן פעסטע שטעלונג פון דאס גאנצע יהדות החרדית, זיך נישט צו בייגן אויף קיין שום פאל צו סיי וועלכע גיוס פארלאנגען, און געבעטן פונעם אמבאסאדער וועלכער איז א שומר תורה ומצוות צו טון וואס מעגליך אפצושאפן די שרעקליכע גזירה.
