צום יעצטיגן נייעם זמן הלימודים ראש חודש אלול, איז געעפנט געווארן בשעה טובה ומוצלחת די נייע ישיבה קטנה "עטרת משה מאקאווא" אין קרית אתא, וואס איז געעפנט געווארן בהדרכתו המלאה פון כ"ק גאב"ד מאקאווא שליט"א וועלכער באגלייט די ישיבה אויף א פערזענליכע פארנעם.
דעם זונטאג די ערשטע טאג ראש חודש אלול, איז דער מאקאווא רב שליט"א אנגעקומען אין די בנין הישיבה, צו זעהן פונדערנאנט די פראכטפולע היכל בית המדרש וואס מען האט צוגעגרייט פאר די בחורים, די שיעור צימערן און אלע אנדערע באדערפענישן. צומארגנס מאנטאג איז דער רב ווידער אנגעקומען בין כותלי הישיבה, א קורצע צייט בעפאר די בחורים זענען אנגעקומען צום פתיחת הזמן. דער רב האט זיך געשטעלט ביים בימה און מתפלל געווען א תפילה חרישית, איידער דער רב האט אנגעוואונטשן די חשובע מגידי שיעור און דער מנהל רוחני הרה"ג ר' מנחם פריעדמאן שליט"א פון חיפה.
שפעטער פארנאכטס נאך תפילת מנחה, די ערשטע תפילה מיט די בחורי הישיבה בצוותא חדא, איז דער מאקאווא רב ווידער אנגעקומען צו באשיינען די מעמד פתילת הישיבה, מען האט געזינגען ווארעמע ניגונים, און הרה"ג ר' נפתלי שובאקס שליט"א האט אויפגעטרעטן מיט א דרשה. דערנאך האט אויפגעטרעטן הגה"צ ר' חיים מענדיל לעמבערגער שליט"א זון פון כ"ק גאב"ד מאקאווא שליט"א, און דאן האט מען געהאט די זכיה צו הערן דברות קודש פונעם רב, וועלכער האט דערנאך פארטיילט לעקאך פאר די בחורים און מגידי שיעור.
