מיט גרויס צער און טרויער ווערט אויפגענומען יעצט אינדערפרי די ביטערע בשורה, איבער די פטירה פון הרבנית הצדיקת מוויזניץ ע"ה, אשת חבר כ"ק אדמו"ר מוויזניץ שליט"א פון קייאמישע, און ברתא דמלכא קדישא פון כ"ק אדמו"ר הרה"ק מראחמיסטריווקא זי"ע, אין עלטער פון 70 יאר.
די רעבעצין איז געווען נישט געזונט די לעצטע פאר יאר, און די לעצטע פאר חדשים איז זי ליידער געלעגן על ערש דוי זייענדיג אנגעוויזן אויף רחמי שמים. היינט פארטאגס האט די רעבעצין פלוצלינג אויסגעהויכט איר נשמה, זייענדיג אין א נוירסינג היים אין ניו דזשערזי.
די חשובע רעבעצין הרבנית פיגא שפרה האגער ע"ה איז געווען די עלטסטע טאכטער פון כ"ק אדמו"ר הרה"ק מראחמיסטריווקא זי"ע, וועמענס צווייטע הילולא קדישא עס איז אויסגעפאלן פארלאפענע וואך. אן אייניקל פון הרה"ק מסקווירא זי"ע און נאך פילע צדיקים וקדושים, צו וועם די רעבעצין האט זיך מתייחס געווען מיט גרויס שטאלץ און נאכגעגאנגען די שיינע וועגן בחיים חיותה.
אנהייב חודש ניסן תשט"ו איז זי געבוירן געווארן אין וויליאמסבורג, אלס עלטסטע קינד צו איר גרויסן פאטער דער ראחמיסטריווקא רבי זצ"ל, און להבדיל בין חיים לחיים איר געשעצטע מוטער הרבנית הצדיקת מראחמיסטריווקא תליט"א. נישט לאנג דערויף האבן זיי זיך געצויגן קיין שיכון סקווירא, אינאיינעם מיטן גרויסן זיידן הרה"ק מסקווירא זי"ע, אויף וועמענס שויס די חשובע רעבעצין האט געהאט די זכיה צו פארברענגען און נהנה זיין מזיו אורו הגדול.
חודש אדר תשל"ב איז זי אריינגעקומען בברית הנישואין, מיט איר גרויסער מאן און ערשטע קאזין להבחל"ח כ"ק אדמו"ר מוויזניץ שליט"א על ישראל הדרתו אין קרית וויזניץ קייאמישע לעיק, וועלכער איז דער דריטער זון פון איר פעטער הרה"ק בעל תורת מרדכי מוויזניץ זי"ע. אלע יארן איז זי צוגעשטאנען לימין קדשו, סיי אין די ערשטע תקופה ווען זיי האבן געוואוינט אין סקווירא שטעטל, און סיי שפעטער ווען מען האט זיך אריבערגעצויגן קיין מאנסי. א קורצע תקופה האבן זיי געוואוינט אין מאנטריאל וואו איר מאן דער רבי שליט"א האט משמש געווען ברבנות אין די וויזניצע קהילה, און די לעצטע צוויי און צוואנציג יאר האט זי געוואוינט אין די וויזניצע שטעטעלע אין גיבערס אויף די הויכע קאנטרי בערג.
די רעבעצין ע"ה איז אנגעגאנגען מיט איר סדר היום שטיל און באשיידן, קיינמאל נישט געמאכט קיין וועזן פון זיך, געטריי באדינט איר גרויסן מאן און צו די זעלבע צייט געווען אן עזר מקודש פאר איר גרויסן פאטער דער ראחמיסטריווקא רבי זצ"ל. מיט א זעלטענע איבערגעגעבנקייט האט זי אויפגעשטעלט דעם הערליכן דור, און געפלעגט דעם שיינעם גארטן. צו דעם אלעם איז זי געווען די הויכגעשעצטע רעבעצין אין די וויזניצע שטעטל, געטון וואס מעגליך צו פארשפרייטן תורה ויראת שמים און בויען דעם שיינעם שטעטל, מחזק זיין די קינדערלעך און באגלייטן יעדן מיט וואס עס פעלט זיך אויס, אבער מיט א זעלטענע באשיידנקייט און צניעות אין יעדן הינזיכט.
ליידער איז זי נישט געזונט געווען די לעצטע פאר יאר, נאך פארשידענע געזונטהייט קאמפליקאציעס מיט וואס זי האט זיך געמוטשעט. שבת נאך שבועות איז זי דאס לעצטע מאל אריינגעפירט געווארן אין שפיטאל וואו מען האט איר געדארפט ארויפלייגן אויף מאשינען, און זינט דעמאלטס האט זי געוויילט פאר לאנגע וואכן אין שפיטאל און דערנאך אין א ריהעב פאר בעסערע באהאנדלונגען, ביז היינט פארטאגס ווען זי איז פלוצלינג נפטר געווארן לחיי העולם הבא.
די לוויה איז באשטימט אויף צען דרייסיג פארמיטאג פארנט פון ביהמ"ד הגדול אין קרית וויזניץ קייאמישע לעיק, וואו מען וועט דורכפירן די הקפות כנהוג און זיך געזעגענען, דערנאך וועט די לוויה אריבערגיין נעבן די בנין הישיבה אין גיבערס וואו די נשים וועלן זיך פארזאמלען אפצוגעבן דעם כבוד האחרון.
שפעטער נאכמיטאג וועט פארקומען די לוויה פארנט פון ביהמ"ד הגדול אין שיכון וויזניץ מאנסי, און פון דארט וועט מען באגלייטן די מיטה צופיס ביז די וויזניצע בית החיים, וואו די רעבעצין וועט קומען לקבורה אינעם אוהל פון די וויזניצע רעבעצינס, נעבן דעם ציון הק' פון הרה"ק בעל תורת מרדכי מוויזניץ זי"ע.
די רעבעצין לאזט איבער א הערליכע דור פון חשובע קינדער, אייניקלעך, און אור אייניקלעך, די קינדער הגה"צ ר' חיים מאיר האגער שליט"א, איידעם ביי זיין פעטער הגה"צ אבד"ק ראחמיסטריווקא מאנסי שליט"א, הגה"צ ר' יעקב יוסף האגער שליט"א איידעם ביי זיין פעטער כ"ק אדמו"ר מקאסאני שליט"א, הגה"צ ר' אברהם יהושע העשיל האגער שליט"א איידעם ביי זיין פעטער כ"ק אדמו"ר מבארניב שליט"א, הגה"צ ר' ישראל האגער שליט"א ראש ישיבת בנין אבות וויזניץ קייאמישע, איידעם ביי זיין פעטער כ"ק אדמו"ר מוויזניץ שליט"א פון בית שמש, הגה"צ ר' דוד האגער שליט"א איידעם ביי זיין פעטער כ"ק אדמו"ר מוויזניץ שליט"א פון וויליאמסבורג, הגה"צ ר' ברוך האגער שליט"א איידעם ביי כ"ק אדמו"ר מנצח מנחם ספינקא שליט"א, און הגה"צ ר' יוחנן האגער שליט"א איידעם ביי הגה"צ ר' יעקב יוסף האגער שליט"א בן כ"ק אדמו"ר מוויזניץ שליט"א פון מאנסי, און איידעם ביי כ"ק אדמו"ר מסקווירא שליט"א.
די איידימער זענען הגה"צ ר' ישראל יצחק בריעף שליט"א ראש כולל וויזניץ קייאמישע, הגה"צ ר' דוד טווערסקי שליט"א בן כ"ק אדמו"ר מטשערנאביל שליט"א פון בני ברק, הגה"צ ר' מרדכי פנחס טווערסקי שליט"א ראש ישיבת עסק התורה ראחמיסטריווקא, בנו הגדול פון כ"ק אדמו"ר מראחמיסטריווקא שליט"א, הגה"צ ר' יהושע פיש שליט"א, זון פון כ"ק אדמו"ר מביקסאד שליט"א, הגה"צ ר' וועלוויל פיש שליט"א, הגה"צ ר' ישראל האגער שליט"א בן כ"ק אדמו"ר מוויזניץ שליט"א פון לאנדאן, הגה"צ ר' חיים מאיר האגער שליט"א בן כ"ק אדמו"ר מוויזניץ שליט"א פון בארא פארק.
צו דעם לאזט די רעבעצין איבער איר חשובע מאמע די הויכגעשעצטע ראחמיסטריווקא רעבעצין תליט"א, וואס דארף אצינד ליידער באגלייטן דעם דריטן קינד אויפן לעצטן וועג, שטייענדיג נאך ביום החופה פון א אייניקל. די ברידער כ"ק האדמורי"ם שליט"א לבית ראחמיסטריווקא, אין וועלכע עס ציילט זיך כ"ק אדמו"ר מראחמיסטריווקא שליט"א פון אוקוויין וועלכער מאכט היינט חתונה א קינד בשעה טובה ומוצלחת, און כ"ק אדמו"ר מראחמיסטריווקא שליט"א פון לעיקוואד וועלכער מאכט חתונה א אייניקל דעם סוף וואך.
שנשמע ונתבשר בשורות טובות.
