בחצר הקודש קרעטשניף סיגעט איז פארגעקומען א גרויסארטיגן שבת הכתרה, שטייענדיג בעמק הבכא צו די הסתלקות פון כ"ק אדמו"ר מקרעטשניף סיגעט זצ"ל, ווען די חסידים האבן זיך געטרייסט מיטהאלטענדיג בצל בניו ממשיכי דרכו בקודש כ"ק האדמורי"ם מקרעטשניף סיגעט שליט"א.
צוליב דעם ריזן ציבור המשתתפים זענען די תפילות און טישן פארגעקומען אינעם גרויסן שאטער ביי ביהמ"ד פינסק קארלין אין די בית ישראל געגנט, וואס געפונט זיך נישט ווייט פון ביהמ"ד קרעטשניף סיגעט אויף רחוב ראפאפורט, אויסער די תפילות ליל שבת קודש וואס מען האט יא געדאווענט בבית מדרשו של רבי, באותו מקום וואו גענוי א וואך פריער איז דער רבי זצ"ל נאך אריינגעקומען צו תפילת מנחה בשלהבת אש קודש, געציילטע מינוטן בעפאר ער איז פלוצלינג צוזאמגעפאלן על משכבו האחרון.
די געהויבענע שבת הכתרה איז געווען די ערשטע עפנטליכע מעמדים וואס די נייע רבי'ס האבן געפירט ברוב עם, זייענדיג ממשיך מסורת אביהם אריינצושיינען דעם קדושת שבת אין אידישע הערצער, און אויפצופלאקערן אידישע קינדער לאביהם שבשמים אויפן קרעטשניפער נוסח. הויכשטאקיגע פארענטשעס זענען געווארן אויפגעשטעלט פארן ריזן ציבור, און עס איז געווען ווייט פון גענוג צו קענען אקאמאדירן אזא גרויסער עולם וואס איז געקומען מיטהאלטן די לעכטיגע טישן.
די ברידער האדמורי"ם האבן זיך צוטיילט מיט די כיבודים, כ"ק אדמו"ר מקרעטשניף סיגעט שליט"א האט געדאווענט פארן עמוד תפילת שחרית, כ"ק אדמו"ר מקרעטשניף סיגעט וומס"ב שליט"א האט געדאווענט פארן עמוד קבלת שבת, כ"ק אדמו"ר הרה"צ רבי ניסן חיים מרדכי שליט"א האט געדאווענט מנחה ערב שבת, און כ"ק אדמו"ר הרה"צ רבי יואל זוסמאן שליט"א האט געדאווענט פארן עמוד פסוקי דזמרה.
פרייטאג צונאכטס ביים דורכגיין וואונטשן גוט שבת, האבן די נייע רבי'ס געבענטשט די קינדער מיט די הענט, כמנהג אביהם הגדול, די טיש האט זיך אנגעהויבן מיטן זמר כל מקדש, און אלע ברידער האבן געזינגען די זמירות און פארטיילט שיריים. מיטן בענטשן פרייטאג צונאכטס איז מכובד געווארן חתנו הגדול פונעם רבי'ן זצ"ל הגה"צ רבי דוד צבי קאהן שליט"א אבד"ק תולדות אברהם יצחק בית שמש, און מיטן בענטשן ביי שלש סעודות דער צווייטער איידעם הגה"צ ר' אהרן קאהן שליט"א אבד"ק תולדות אהרן מאנסי.
מיט די עליות זענען מכובד געווארן די נאנטע מקורבים און משמשים בקודש ביים רבי'ן זצ"ל, ביים מיטאג טיש האט דער צווייטער זון כ"ק אדמו"ר מקרעטשניף סיגעט וומס"ב שליט"א אויפגעטרעטן מיט ווארעמע ווערטער בגודל השלום והאחדות, און שטארק גערעדט בשבח אחיו הגדול כ"ק אדמו"ר מקרעטשניף סיגעט שליט"א.
