טויזענטער אידן האבן נעכטן באגלייט למנוחות, הרבנית הצדיקת מוויזניץ ע"ה, אשת חבר כ"ק אדמו"ר מוויזניץ שליט"א פון קייאמישע, און עלטסטע טאכטער פון כ"ק אדמו"ר הרה"ק מראחמיסטריווקא זי"ע, וועלכער איז נפטר געווארן אין בליענדן עלטער פון זיבעציג יאר נאכן נישט זיין געזונט די לעצטע פאר יאר.
די לוויה האט זיך אנגעהויבן מאנטאג פארמיטאג פארנט פון ביהמ"ד הגדול אין קרית וויזניץ קייאמישע לעיק, וואו מען האט געזאגט קל מלא רחמים און באגלייט די מיטה ביז צום בנין הישיבה, וואו די נשים האבן זיך פארזאמלט אפצוגעבן דעם כבוד האחרון.
דערנאך איז די מיטה געפירט געווארן אויפן וועג קיין בארא פארק, ווען אונטערוועגנס האט מען זיך אפגעשטעלט ביי די עטרת טשארנא זאל נעבן שיכון סקווירא, וואו דער דאפלטער פעטער כ"ק אדמו"ר מסקווירא שליט"א איז ארויסגעקומען באגלייטן בראש קהל חסידיו, אינאיינעם מיט די הונדערטער תלמידי הישיבות דחסידי סקווירא.
נעבן די בנין התלמוד תורה ביים אריינגאנג צום סקווירא שטעטל האבן אפגעווארט פילע נשים פון שיכון סקווירא, נאך וואס די חשובע נפטרת ע"ה איז אויפגעוואקסן אין סקווירא שטעטל, אלס באליבטע אייניקל ביי הרה"ק מסקווירא זי"ע, און האט געוואוינט דארט אויך נאך די חתונה. ביים עטרת טשארנא זאל זענען געווען פארזאמלט פילע חסידים אפצוגעבן דעם כבוד האחרון, און הגה"צ ר' יוסף ישראל אייזענבערגער שליט"א האט פארגעזאגט קל מלא רחמים.
אנקומענדיג קיין בארא פארק ארום דריי אזייגער איז פארגעקומען די לוויה פארנט פון ביתו נאוה קודש פון הרה"ק מראחמיסטריווקא זי"ע, וואו די מאמע הרבנית הצדיקת מראחמיסטריווקא תליט"א האט זיך געזעגנט. דער משב"ק לבית ראחמיסטריווקא הרב החסיד ר' יהושע חיים קאסטען הי"ו האט געזאגט קל מלא רחמים, און די פיל קעפיגער ציבור האט באגלייט די מיטה אראפ די פינף און פערציגסטע סטריט ביז ניו יוטרעקט.
שפעטער נאכמיטאג ארום פינף אזייגער האט זיך אנגעהויבן די לוויה פארנט פון ביהמ"ד הגדול אין שיכון וויזניץ מאנסי, מען האט אפגעראכטן די הקפות כנהוג, פארגעזאגט דורך הרה"ג ר' יחיאל שטיינמעטץ שליט"א מרבני החברה קדישא, די אבלים האבן געריסן קריעה, און דאן האט מען באגלייט די מיטה צופיס דעם לאנגן וועג ביז צום וויזניצע בית החיים, וואו די רעבעצין איז געקומען לקבורה אינעם אוהל פון די וויזניצע רעבעצינס, נעבן דעם ציון הק' פון הרה"ק בעל תורת מרדכי מוויזניץ זי"ע.
דורכאויס די לוויה האבן זיך באטייליגט פילע אדמורי"ם ורבנים און קרובי המשפחה, בראשם האחים האדמורי"ם מוויזניץ און האחים האדמורי"ם מראחמיסטריווקא, האדמורי"ם מטשערנאביל, סקווירא מב"פ, בארניב, ביקסאד, קאסאני, שאץ, זוועהיל ארה"ב, קאסאן הילקרעסט, לויעוו טשערנאביל פארשעי, תולדות מרדכי, דזיקוב וויזניץ, גאב"ד סאטמאר ב"פ, גאב"ד פאלטישאן, אב"ד סאדאוונא, אב"ד נירבאטור, אב"ד טשערנאוויץ ב"פ, אב"ד ברעזאן, אב"ד מיקאלייעוו, אב"ד אלכסנדר ב"פ, אב"ד זלאטיפאלי, ראב"ד סקווירא, און נאך פיל.
