ביטערע נייעס הערט מען ליידער אין די יעצטיגע שעות, אז עס איז נפטר געווארן הב' החשוב יוסף יהושע פריעדמאן ע"ה, א באליבט קינד פונעם באקאנטן עוסק בצרכי ציבור, און מייסטער ארגאנאזירער פון מערערע גרויסע מעמדים, הרב החסיד ר' אליעזר פריעדמאן הי"ו מחשובי חסידי סאטמאר אין מאנסי.
הב' החשוב יוסף יהושע ע"ה האט געלערנט אין ישיבה גדולה נייטרא, און האט די לעצטע צוויי חדשים פארבראכט אין די ישיבה קעמפ אין קערהאנקסאן, וואו ער איז געשטיגן בדרכי התורה והיראה, און פארברענגט מיט חברים מיט מידות טובות און יראת שמים.
ליידער איז ער עלעקטעריזירט געווארן אויף א גאר שווערע פארנעם, זייענדיג אין מקוה זיך צו מקדש ומטהר זיין, טראץ די איבערמידליכע פרואוון אים צו ראטעווען האט ער זיך ליידער געוואלגערט בין מות לחיים פאר צוויי וואכן, ביז יעצט ביינאכט ווען ער האט צוריקגעגעבן זיין ריינע אויסגעלייטערטע נשמה ליוצרה.
דער חשובער נפטר הב' יוסף יהושע בן ר' אליעזר, האט זוכה געווען צו אנברענגען א מורא'דיגע קידוש שם שמים, ווען פאר צוויי וואכן האבן טויזענטער אידן זיך מקבל געווען קבלות טובות לרפואתו, מתפלל געווען און שלום געמאכט איינער מיטן אנדערן, וואס האט זיכער געמאכט א מורא'דיגע רושם אויבן אין הימל, ליידער איז אבער די שווערע גזירה געווען פארשריבן, און אצינד גרייט מען זיך אים צו באגלייטן אויפן לעצטן וועג מיט א שרעקליכע טרויער.
ויהי רצון שלא ישמע עוד שוד ושבר בגבולינו
