א שווערע בשורה איז אנגעקומען פון ארץ ישראל, איבער די פטירה פון הרב הגאון ר' דוד קאמינעצקי ז"ל, בנו חביבו פון להבחל"ח הגאון הגדול רבי שמואל קאמינעצקי שליט"א, זקן ראשי הישיבות אין אמעריקע וראש ישיבת פילאדעלפיע.
הגאון ר' דוד איז געווען אכט און זעכציג יאר אלט, און איז געווען א גרויסער גאון בתורה והוראה, מחבר געווען פילע ספרים, אנגעפירט א מכון "פרקי אליעזר" נאכצוגיין פריערדיגע ספרים פון גדולי וגאוני תורה, ער איז נאך אויפגעוואקסן אויפן שויס פון זיין גרויסן זיידן הגאון הגדול רבי יעקב קאמינעצקי זצ"ל ראש ישיבת תורה ודעת. זיין גדלות בתורה האט זיך אנגעזעהן אויף טריט און שריט, און אלע זיינע יארן האט ער זיך געווייקט בעולם התורה, מחדש געווען חידושים, און מגלה געווען אוצרות פון די פריערדיגע גאונים.
ליידער איז ער נפטר געווארן דעם שבת קודש אין בליענדן עלטער פון אכט און זעכציג יאר, איבערלאזנדיג א הערליכע דור בליעה"ר, און זיין גרויסן פאטער הגאון הגדול רבי שמואל שליט"א דער זקן ראשי הישיבות באמעריקע. די לוויה איז פארגעקומען היינט פארמיטאג ביים בית הכנסת חניכי הישיבות תורת חיים אין די הר נוף געגנט אין ירושלים.
