מיט שווערע געמיטער ווערט אויפגענומען די בשורה הלא טובה, איבער די פטירה פון הרב החסיד המפואר ר' אהרן בלום ז"ל, מראשי קהילת תולדות אהרן אין ירושלים עיר הקודש, וועלכער האט אויפגעטון א וועלט אין דעם געביט פון ספרי קודש, זייענדיג מחבר און מוציא לאור פילע ספרי קודש דורכאויס די יארן.
הרב החסיד ר' אהרן איז געווען א זון פון הרב החסיד ר' מרדכי דוד בלום ז"ל, און איז פאר יארן לאנג געווען פון די פירנדע עסקנים בחצר הקודש תולדות אהרן, גבאי אין ביהמ"ד הגדול און געטרייער עבד נאמן פאר צדיקי בית תולדות אהרן.
ר' אהרן איז געווען א תלמיד חכם מופלג, געקענט א געוואלד לערנען, און אליינס מחבר געווען ספרים, צווישן זיי די פירוש "משנת אליעזר" אויף ששה סדרי משנה. אזוי אויך האט ער איבערגעשריבן פירושים און ארויסגעגעבן פילצאליגע ספרי קודש, די באקאנטע חומשים הוצאת א. בלום, ספרי אור החיים הק' און נאך חסידישע ספרים.
אין צוגאב צו זיין גדלות בתורה וספרי קודש, איז זיין שטוב געווען אפן לכל דורש ומבקש, פילע בחורים פלעגן זיך קלאמערן ביי זיין שטוב ביי די שבת'דיגע סעודות און מלוה מלכה'ס, ער האט געטון אסאך ארויסצוהעלפן נויטבאדערפטיגע אידן, און זוכה געווען אויפצורעכטן פילע אידישע קינדער וואס האבן אויפגעברענגט א שמייכל א דאנק זיין השתדלות.
