בחצר הקודש סקולען איז געמאלדן געווארן אז היי יאר וועט כ"ק אדמו"ר מסקולען שליט"א פראווענען די ימים הנוראים אין די גרויסע ריגער זאל אין בארא פארק, וואס געפונט זיך אינעם בנין פון בנות ציון ד'באבוב ביים ווינקל פון די פערצנטע עוועניו און די פופציגסטע סטריט.
שוין א שיינע פאר יאר וואס קהילה קדושה סקולען דינגט ארויס די בנין המתיבתא פון באבוב 45, וואו עס איז געפראוועט געווארן די ימים הנוראים ברוב עם הדרת מלך, בצל הקודש פון כ"ק אדמו"ר הרה"ק מסקולען זצ"ל, און לעצטע יאר אויך ראש השנה תשפ"ה, בצל הקודש פון בנו ממלא מקומו כ"ק אדמו"ר מסקולען שליט"א.
דאס יאר ווען די בנין המתיבתא איז שוין נישט אין באנוץ, זיך גרייטענדיג צו א גרעסערע בוי פראיעקט אין צוזאמענהאנג מיטן בנין האדיר ביהמ"ד הגדול והחדש מרכז העולמי באבוב 45, איז שוין נישט מעגליך צו אפרעכטן דעם ירח האיתנים אין די בנין המתיבתא, דעריבער האט די סקולענער קהילה ארויסגעדינגען די ריגער זאל, וואו דער רבי שליט"א וועט אפרעכטן די ימים הנוראים, און די צווייטע טעג סוכות ברוב עם הדרת מלך, מיט די באטייליגונג פון פילע חסידים פון נאנט און ווייט.
