גענוי ווי עס האט פאסירט מיט א יאר צוריק, זענען טויזענטער אידן געבליבן געשטראנדעט אויף די וועגן און שטעגן אהיים פון אומאן אוקראינע, נאכן וויילן אויף יו"ט ראש השנה סמוך ונראה צום ציון הק' פון הרה"ק רבי נחמן מברסלב זי"ע.
די לאנגע רייזעס איז שוין געווען היבש שווער אויפן וועג קיין אומאן בעפאר ראש השנה, ווען הונדערטער מענטשן זענען אנגעקומען אן זייערע פעקלעך, וואס איז שטעקן געבליבן אין פארשידענע לופטפעלדער לענגאויס ארומיגע לענדער, אבער נאך יו"ט איז די שטראנדערייען פילפאכיג געשטיגן, ווען צענדליגע טויזענטער אידן זענען ארויסגעפארן אויפן וועג אהיים צו זיין אינדערהיים אויף די קומענדיגע ימים טובים, אבער די ליניעס ביי די גרעניצן איז שרעקליך אנגעשטויסן, וואס טוט שטארק אפעקטירן צענדליגע טויזענטער אידן.
דורכאויס די לעצטע אכט און פערציג שעה זינט דעם זמן מוצאי יו"ט, זענען צענדליגע טויזענטער אידן ארויסגעפארן פון אומאן אויפן וועג צו די גרעניצן אריין צו אנדערע לענדער, פון וואו מען נעמט א פליגער אהיים קיין אמעריקע אדער ארץ ישראל און נאך לענדער, די ליניעס ביי די גרעניצן האט געדויערט א געשאצטע זיבן שעה, פירנדיג דערצו אז מאסן אידן זאלן פארפאסן זייערע פליגערס, און טשארטער פליגערס זאלן דארפן ווערן אפגערופן צוליב די סיטואציע.
שטייענדיג יעצט פרייטאג מיטאג ווען אויפן אייראפעאישן האריזאנט איז מען שוין מקבל שבת, זענען טויזענטער אידן געשטראנדעט אין פילע שטעט לענגאויס אייראפע, אין לופטפעלדער און ביי גרעניצן, אין לאקאלע האטעלן און צייטווייליגע געצעלטן, פילע עסקנים האבן געטון וואס מעגליך צו פארגרינגערן פאר די אלע אידן דורכאויס שבת, און די געוואלדיגע קידוש השם שרייט זיך ארויס פון אלע זייטן.
דא אין ניו יארק וואו מען גרייט זיך צום שבת קודש וואס קומט אין פינף שעה ארום, ווערן אויך געמאכט פיבערהאפטיגע צוגרייטונגען אויף פארשידענע פראנטן, נאך וואס עטליכע פליגערס זענען ערווארטעט צו לאנדן שפעט נאכמיטאג, אריינגערעכנט א פליגער פון בוקארעסט קיין דזשעי עף קעי וואס דארף צו לאנדן נאנט צו פינף אזייגער נאכמיטאג, און פילע אידישע ארגענעזאציעס אריינגערעכנט חברים און שומרים פון וויליאמסבורג, ארבעטן העפטיג צוצושטעלן אלעס וואס פעלט זיך אויס, צענדליגע באסעס צו אלע שטעט, און סעודות שבת אין פאל מענטשן וועלן בלייבן געשטראנדעט אין לופטפעלד אדער ארומיגע געגנטער.
