א היסטארישע פארזאמלונג וואס איז שוין לאנג נישט געזעהן געווארן, איז פארגעקומען די וואך ברחובות העיר רבתי עם "ניו יארק", ווען שווערע טויזענטער אידן פון איבער גרעיטער ניו יארק און ניו דזשערזי האבן זיך פארזאמלט אויסצושרייען דעם קול מחאה וזעקה, די וויי געשריי פון דאס גאנצע יהדות החרדית, אין ליכט פון די שרעקליכע רדיפת הדת בארצינו הקדושה, ווען די רשעי הציונים פייניגן די חשובע בחורים און אינגעלייט וואס שטעלן זיך נישט צום טריפה'נעם מיליטער כהוראת הקודש פון די גדולי הדור.
ווי נאר די נייעס איבער די מחאה אדירה איז געמאלדן געווארן פארלאפענעם יו"ט שמחת תורה, האט זיך אנגעצינדן א פלאם פייער ביי גאנץ כלל ישראל, אין קארגע דריי טעג האבן די עסקנים פון די קהילות הקודש באוויזן צו ברעכן טירן און מויערן אויסצוהאמערן אלע דעטאלן און פונקטן צו פארזיכערן די מאקסימום הצלחה פונעם עצרת מחאה, און אז די ווייטגרייכנדע מעסעדזש זאל אנקומען ווי עס ברויך מיט די ריכטיגע משמעת.
זונטאג נאכמיטאג פרשת נח, צום באשטימטן צייט פיר אזייגער נאכמיטאג, האבן שוין טויזענטער אידן אנגעהויבן שטראמען צו די דעזיגנירטע גאסן פארנט פון די ציוניסטישע קאנסולאט אויף די צווייטע עוועניו אין מאנהעטן, עטליכע גאסן זענען געווארן בלאקירט צו קענען אקאמאדירן די צענדליגע טויזענטער אידן, ווען הונדערטער באסעס קורסירן פון אלע שטעט לענגאויס ניו יארק און ניו דזשערזי צו ברענגען דעם ציבור מיט די גרעסטע מעגליכקייט.
די בארימטע וויי עף פראדאקשען פירמע האט געארבעט איבערמידליך מיט די עסקני הקהילות צוצושטעלן דעם גאנצן מעמד מהחל ועד כלה, מיט אלע באדערפענישן וואס האט זיך אויסגעפעלט אויף די טעכנישע און לאגיסטישע זייטן. און די רענטעסטיק פארטי רענטל פירמע האט צוגעשטעלט די הונדערטער בענקלעך פאר די עלטערע אידן וזקני העדה, ובראשם אדמורי"ם רבנים וראשי ישיבות.
פילע אדמורי"ם ורבנים, דיינים און ראשי ישיבות, האבן זיך משתתף געווען בראש הנאספים, ובראשם האט זיך אנגעזעהן די פערזענליכע השתתפות פון כ"ק האדמורי"ם מסאטמאר שליט"א, כ"ק אדמו"ר מבאבוב 45 שליט"א, און כ"ק האדמורי"ם מתולדות צבי ספינקא און קאשוי שליט"א.
בראש הדרשנים האט אויפגעטרעטן הגה"צ ר' יהושע נחמן בערגער שליט"א ראש ישיבת אהל תורה, וועלכער האט אויפגערופן די אנדערע בעלי דרשנים, און אליינס אויפגעפלאמט דעם גאנצן ציבור בהתעוררות רב, עס האבן אויפגעטרעטן הגה"צ המשפיע ר' דוד הירשלער שליט"א פון ארץ ישראל, הגה"צ רבי אשר אנשיל אשכנזי שליט"א אבד"ק חוות דעת, הגה"צ רבי יעקב הורוויץ שליט"א אבד"ק זרע קודש וראש ישיבת בית מאיר, הגה"צ ר' שבתי קעסטנבוים שליט"א מדייני סאטמאר, און הרה"ג ר' אהרן גרינבערג שליט"א מיט א ספעציעלע דרשה אויף ענגליש פאר די פרעסע.
כ"ק אדמו"ר מבאבוב 45 שליט"א האט פארגעזאגט קבלת עול מלכות שמים מיט גרויס התעוררות, איידער דער פילקעפיגער ציבור וואס איז געווען געשאצט אויף די מיטעלע צענדליגער טויזענטער, האט זיך אנגעהויבן פארשפרייטן אויפן וועג אהיים.
