היינט נאכמיטאג ביים מסע הלוויה פון כ"ק גאב"ד ראדאמישלא, הגה"צ רבי יצחק ארי' לייבוש האלפערין זצ"ל, איז אויפגענומען געווארן אלס ממלא מקומו ברבנות, בנו חביבו הגה"צ רבי יעקב מאיר שמחה האלפערין שליט"א, איידעם ביי הגה"צ אבד"ק מאקאווא ירושלים זצ"ל, וועלכער דינט שוין לאנגע יארן אלס מרביץ תורה און ראש הכולל "מהר"ש ענגיל" אין ירושלים עיה"ק.
דער רב שליט"א איז דער צווייטער זון פונעם גרויסן נפטר דער ראדאמישלא רב זצ"ל, נאכן עלטסטן זון הגה"צ רבי יחזקאל שרגא דוד האלפערין זצ"ל דומ"ץ צאנז רמות, וועלכער איז נפטר געווארן מיט א האלבע יאר צוריק. פאר לאנגע יארן צוריק האט ער שוין ממלא מקום געווען דאס הרבצת התורה שטעלע פון זיין פאטער דער רב זצ"ל, וועלכער פלעגט דינען אלס ראש הכולל "מהר"ש ענגיל", און אצינד איז ער נתעטר געווארן בכתר הרבנות צו דינען אלס "גאב"ד ראדאמישלא אין רמות", און ווייטער פירן דעם בית המדרש פון זיין פאטער אין די רמות ג' געגנט אין ירושלים.
ביים מסע הלוויה האט כ"ק אדמו"ר מצאנז שליט"א, א שוואגער פונעם רב זצ"ל, אויפגעטרעטן מיט דברי הספד, און אויסגערופן די הכתרה בשער בת רבים, אז דער זון הגה"צ רבי יעקב מאיר שמחה האלפערין שליט"א, וועלכער איז א מחותן מיטן צאנזער רבי'ן שליט"א, ווערט אויפגענומען אלס ממלא מקום לשרת בקודש.
אזוי אויך איז געווארן אויפגענומען דער עלטסטער אייניקל הגה"צ ר' חיים יוסף האלפערין שליט"א אלס גאב"ד ראדאמישלא אין בני ברק. ער איז דער עלטסטער זון פון הגה"צ רבי יחזקאל שרגא דוד האלפערין זצ"ל דומ"ץ צאנז רמות, עלטסטער זון פונעם ראדאמישלער רב זצ"ל, און א איידעם ביי הגה"צ ר' לייבוש טוביאס שליט"א רב חסידי בוהוש.
