ווידער שפילט זיך אפ היינט שטורמישע פראטעסטן לענגאויס ארץ ישראל, נאך וואס די פאליציי אין מדינת ישראל האט דורכגעפירט דריי פרישע ארעסטן אויף בני תורה, פארן איינציגן זינד פון זיך נישט שטעלן צום מיליטער, טראץ וואס עס איז אפיציעל געמאלדן געווארן אז מען וועט מער נישט ארעסטירן ישיבה בחורים וואס שטעלן זיך נישט צום מיליטער.
איינער פון די בחורים וועלכער איז ארעסטירט געווארן, איז א יתום אינמיטן די שבעה פון זיין טאטן, נאך גרויסע דרוק האט מען אים באפרייט נאך א קורצע צייט, אבער א אנדערע בחור וואס לערנט אין ישיבת עטרת שלמה אין ראשון לציון איז פאראורטיילט געווארן צו זיצן אין טורמע פאר צוואנציג טעג, וואס האט צוגעברענגט גאר שטארקע פראטעסטן לענגאויס פילע שטעט.
הערנדיג איבער די גרויסע מחאות, און איבער א גרויסע געפלאנטע מחאה פארנט פון די מיליטערישע טורמע, מיט די באטייליגונג פון טויזענטער תלמידים פון ישיבת עטרת שלמה, האט דער זקן ראשי הישיבות הגאון הגדול רבי משה הלל הירש שליט"א ראש ישיבת סלאבאדקע אויסגעדרוקט זיין ווילן ארויסצוגיין צום מיליטערישן טורמע און אויסשרייען דעם קול מחאה, און דערביי אויפטרעטן מיטן דרשת פתיחת הזמן און א שיעור כללי, אט אויף דעם פלאץ וואו מען פרובירט אויסצורייסן דעם כח התורה ה"י.
