האדמו"ר מגור ארויסגעשיקט קיין ניו יארק בנו חביבו אלס א שליח מיוחד, אויף ניחום אבלים ביי הנגיד החסיד ר' שלמה ווערדיגער הי"ו
דעם אנהייב וואך איז נפטר געווארן בשיבה טובה האשה החשובה מרת ליבא ווערדיגער ע"ה, אלמנת הרב החסיד ר' נחמי' ווערדיגער ע"ה מחשובי חסידי גור, און מוטער פון להבחל"ח הנגיד החסיד ר' שלמה ווערדיגער הי"ו, יושב ראש אגודת ישראל בארה"ב, ומגדולי התומכים בחצר הקודש גור.
ביי די לוויה וואס איז פארגעקומען דעם דינסטאג האבן זיך באטייליגט פילע אידן ובראשם הונדערטער חסידי גור פון אמעריקע, הרה"ג ר' ישראל משה אלעווסקי שליט"א ראש ישיבת גור האט אויפגעטרעטן מיט דברי הספד, און אזוי אויך איר זון הרב שלמה, און איר איידעם הרב נח ריינדעל שליט"א.
פילע אדמורי"ם ורבנים זענען שוין אנגעקומען קיין בארא פארק אויף ניחום אבלים ביי הנגיד ר' שלמה, כאות הוקרה פאר זיינע פילע לייסטונגען לטובת הכלל והפרט, כ"ק אדמו"ר מוויזניץ שליט"א פון מאנסי איז ספעציעל אריינגעפארן קיין בארא פארק אויף ניחום אבלים, אזוי אויך הגאון הגדול רבי אהרן פעלדמאן שליט"א ראש ישיבת נר ישראל אין באלטימאר, וחבר מועצת גדולי התורה פון אמעריקע.
נעכטן מיטוואך האט כ"ק אדמו"ר מגור שליט"א ארויסגעשיקט בנו חביבו הגה"צ ר' נחמיה אלתר שליט"א, ער זאל פארן קיין אמעריקע אלס זיין פערזענליכע שליח צו מנחם אבל זיין ביי ר' שלמה, נאך וואס דער רבי זעלבסט האט געוואלט קומען, אבער האט נישט די מעגליכקייט נאכן דורכגיין א שווערע תקופה אין געזונט. אזוי אויך איז געקומען צו פארן הרב החסיד ר' יונתן בורנשטיין הי"ו מנכ"ל איחוד מוסדות גור העולמי.
