חסידי ראחמיסטריווקא גרייטן זיך מיטצולעבן געהויבענע ימי שמחה, ווען כ"ק אדמו"ר מראחמיסטריווקא שליט"א פון ספרינג וואלי וועט בעז"ה אונטערפירן בתו הכלה אונטער די חופה, זייענדיג די ערשטע חתונה ביים רבי'ן אין הויף נאכן איבערנעמען די כתר האדמורו"ת מיט צוויי יאר צוריק.
די חתן איז א זון פונעם רבינ'ס פעטער הגה"צ רבי שמואל דוד שניאורסאן שליט"א משגיח ישיבת טשעבין, זון פון הגה"צ רבי יוסף משה שניאורסאן שליט"א ראש ישיבת טשעבין, און איידעם ביי הגה"צ רבי וועלוויל טווערסקי זצ"ל מראחמיסטריווקא, די שמחת האויפרוף איז געפראוועט געווארן דעם שבת קודש פרשת לך לך בהיכל ישיבת טשעבין אין ירושלים.
נעכטן מוצאי שבת קודש איז פארגעקומען די שמחת הפארשפיל אין ראחמיסטריווקא בית המדרש אין מאנסי בתופים ובמחולות, בחצר הקודש פונעם געהויבענעם מחותן דער אבי הכלה, די צווייטע פארשפיל כנהוג איז פארגעקומען ביים וועכנטליכן מלוה מלכה פונעם רבי'ן, אינאיינעם מיט די סעודת עניים און יארצייט טיש לרגל די הילולא קדישא פונעם הייליגן מאור עינים זי"ע.
דעם דינסטאג אויפדערנאכט וועט פארקומען די מנהג הקפות און שמחת החתן מאהל אין ביהמ"ד ראחמיסטריווקא, און מיטוואך וירא וועט פארקומען די גרויסע חתונה אינעם זאל פון אטריום פלאזא אין מאנסי, וואס ווערט צוגעשטעלט דורך די חשובע עסקני הקהילה מיט הונדערטער פלעצער פאר כל הקהל הקודש, און א מלכות'דיגער אויבן אן פאר די פילצאליגע אדמורי"ם ורבנים קרובי המשפחה, און די צענדליגע רבני העיר וואס זענען ערווארטעט צו באשיינען די שמחה.
די געהויבענע שבת של שמחה שבת שבע ברכות וועט געפראוועט ווערן אין די ווילחאוויץ זאלן, אלע תפילות און טישן וועלן פארקומען אינעם זאל אין שפיץ פונעם רבי'ן שליט"א, און זיין גרויסן שווער הגה"צ אבד"ק ראחמיסטריווקא שליט"א, מטעם הקהילה ווערט צוגעשטעלט הכנסת אורחים פאר הונדערטער חסידים וואס קומען מיטהאלטן דעם גרויסן שבת של שמחה. מוצאי שבת וועט פארקומען די צענטראלע שבע ברכות דורך די קהילה, און דינסטאג חיי שרה נאכמיטאג וועט פארקומען די לעצטע שבע ברכות אין ראחמיסטריווקא בית המדרש אין מאנסי.
אין די יעצטיגע טעג ווערן געמאכט פיבערהאפטיגע הכנות אויף מערערע פראנטן, איבערהויפט דורך די בארימטע וויי עף פראדאקשען פירמע אין שפיץ פון העסקן ר' יוחי פליישמאן הי"ו, וועלכע פירן אן מיט אלע לאגיסטישע חלקים פון די שמחה הרוממה.
א ספעציעלע זיצונג איז פארגעקומען אין די פאליציי הויפטקוואטירן אין ספרינג וואלי, מיט די באטייליגונג פון העסקן ר' יוחי פליישמאן הי"ו, העסקן ר' יוסף מארגערעטן הי"ו פון חברים, העסקן ר' הערשל מארגערעטן הי"ו, און א רייע פאליציי הויפטן פון די גאנצע אומגעגנט, אויסצוארבעטן אלע דעטאלן על צד היותר טוב.
