שטייענדיג ווייניגער ווי א וואך צום געהויבענעם מסע הקודש וואס כ"ק אדמו"ר מסאטמאר שליט"א נעמט אונטער קיין ארץ ישראל, זעהן זיך שוין אן די לעצטע צוגרייטונגען דורך די טעטיגע עסקנים, סיי אין אלע שטעט וואו דער רבי וועט באזוכן, און סיי אין אתרא קדישא מירון וואו עס וועט געפראוועט ווערן א גאר געהויבענע שבת בצל הקודש, און א מאסיווע הכנסת אורחים אפאראט איז אקטיוו אהערצושטעלן די טויזענטער אכסניות פאר די טויזענטער חסידים וואס קומען צו פארן לעשות את השבת בצל הקודש.
מארגן דאנערשטאג וועט פארקומען א גרויסע מעמד "צאתכם לשלום" מיט די באטייליגונג פון די הונדערטער תלמידי המתיבתא הק', וואס וועלן איבערגעבן פארן רבי'ן גרויסע געלטער וואס זיי האבן צוזאמגענומען פארן רבינ'ס צדקה קאסע, אויסצוטיילן פאר די עניי ארץ ישראל דורכאויס די באזוך בקרתא דשופריא.
דער רבי שליט"א וועט זיך ארויסלאזן אין וועג דעם מוצאי שבת קודש פרשת חיי שרה, און אנקומען בשערי ארץ הקודש מאנטאג נאכמיטאג נאך א קורצע אפשטעל אונטערוועגנס, שפעטער פארנאכטס וועט פארקומען א גרויסע מעמד קבלת פנים בעיר הקודש ירושלים, אינעם גיגאנטישן שאטער אויף רחוב דורש טוב, אינאיינעם מיט די מעמד סיום כתיבת האותיות פאר די ספר תורה וואס וועט ווערן אריינגעגעבן צומארגנס דינסטאג צום סאטמארער בית המדרש אויף רחוב חגי אין בני ברק.
דינסטאג אינדערפרי וועט דער רבי דאווענען שחרית מיט די תלמידי המוסדות אין ירושלים, און דערנאך באזוכן אין תלמוד תורה און באשיינען די מעמד הכנסת ספר תורה ווי דערמאנט. שפעטער ביינאכט וועט דער רבי אויפנעמען מיט קוויטלעך די חסידים תושבי ירושלים עיה"ק.
מיטוואך אינדערפרי וועט פארקומען א מעמד התעוררות ביים הר הצופים מול מקום המקדש, און דערנאך וועט דער רבי ארויספארן קיין בית שמש און באזוכן אין די ארטיגע מוסדות, און אזוי אויך אויפנעמען די חסידים תושבי העיר מיט קוויטלעך, שפעטער אין טאג וועט פארקומען א מעמד הכנסת ספר תורה צום סאטמארע בית המדרש אין בית שמש, נאכגעפאלגט מיט א מסיבת לחיים ברוב עם.
דאנערשטאג אינדערפרי וועט דער רבי דאווענען שחרית אינאיינעם מיט די תלמידי הישיבה אין ירושלים, און דערנאך באשיינען א רייכע מסיבה פאר נדיבים בעם, אין די זאל פון ויאמר יצחק. דורכ'ן טאג וועט פארקומען א גרויסע מעמד "ירושלים של מעלה", אפצוצייכענען די הרחבת גבולי הקדושה, און די אנהייב פון די בוי ארבעט פאר די נייע בנין האדיר פון מוסדות סאטמאר ירושלים, די מעמד וועט פארקומען אין א גיגאנטישע זאל אויף רחוב מלכי ישראל מתחם שנעלער, אין שפיץ פון מרנן ורבנן שרי התורה חברי הביד"ץ העדה החרדית, ועל צבאם דער סאטמארער רבי שליט"א. ביינאכט וועט דער רבי ארויספארן קיין אתרא קדישא מירון לקראת דעם געהויבענעם שבת עילאה.
פרייטאג ראש חודש כסלו באשמורת הבוקר וועט דער רבי פוקד זיין דעם ציון הק' פון התנא האלקי רבי שמעון בר יוחאי, און מיט גרויס התעוררות אויסזאגן גאנץ ספר תהלים, נאכגעפאלגט מיט תפילת שחרית און אמירת הלל אין די מערה. מוצאי שבת וועט דער רבי אפרעכטן די גרויסארטיגע מעמד ההדלקה מיט די באטייליגונג פון שווערע טויזענטער אידן וואס זענען ערווארטעט מיטצוהאלטן דעם גאנצן שבת מבואו ועד צאתו.
אין די נאכפאלגענדע טעג וועט דער רבי באזוכן בקרב חסידי סאטמאר אין בני ברק, באשיינען א רייע מעמדים בקרב הקהילה והמוסדות, די מעמד חנוכת הבית פארן נייעם בית המדרש אין שיכון קרית יואל, די מעמד חנוכת הבית פאר די נייע בנין בית חינוך לבנות, באזוכן אין די מוסדות און די ישיבה קטנה און ישיבה גדולה. דער רבי וועט פארבלייבן אין בני ברק ביז דאנערשטאג, ווען דער רבי וועט זיך אומקערן אהיים קיין ניו יארק איבערלאזנדיג הויפענעס חיזוק פאר די הונדערטער חסידים אין ארץ ישראל.
