מיט שווערע געמיטער ווערט אויפגענומען די ביטערע בשורה, אז עס איז נפטר געווארן הרבנית הצדיקת מזידטשויב פרעמיסלא ע"ה, אשת חבר כ"ק אדמו"ר הרה"צ רבי הערשל פיש שליט"א מזידטשויב פרעמיסלא, אין בליענדן עלטער פון דריי און פופציג יאר, נאכן זיך מוטשענען מיט די ביטערע מחלה ה"י די לעצטערע חדשים.
די חשובע נפטרת הרבנית פיגא רבקה פיש ע"ה איז געווען א טאכטער פון להבחל"ח הגה"צ רבי יחזקי' יעקב פיש שליט"א אבד"ק מאטע סאלקא, מגזע אראלים ותרשישים, בהגיעה לפירקה האט זי חתונה געהאט מיט איר ערשטן קאזין כ"ק אדמו"ר הרה"צ רבי צבי הירש פיש שליט"א, א זון פון איר טאטנ'ס ברודער כ"ק אדמו"ר מהאדאס שליט"א, חתנא דבי נשיאה פון כ"ק אדמו"ר הרה"ק מטאהש זי"ע.
צענדליגע יארן האט זי געפירט דעם שיינעם שטוב אין קרית טאהש, בצלו פונעם גרויסן זיידן דער טאהשער רבי זי"ע צו וועם איר גרויסן מאן דער רבי שליט"א איז געווען באליבט מיט גרויס חביבות ווי באקאנט. מיט עטליכע יאר צוריק האבן זיי זיך געצויגן קיין מאנסי וואו דער רבי שליט"א האט אוועקגעשטעלט דעם שיינעם הויף על דרך אבותיו הקדושים, צו משפיע זיין און דערהייבן אידישע קינדער לאביהם שבשמים.
די רעבעצין איז געווען מפורסם במעשיה הטובים, זיך אוועקגעגעבן פאר אנדערע, לוחם געווען קעגן די היינטיגע מאדעס און מחזק געווען עניני צניעות אין יעדע געלעגנהייט. זי איז געשטאנען כעזר מקודש צו איר גרויסן מאן דער רבי שליט"א, און געהאלפן פירן דעם שיינעם הויף ברוח ובגשם.
ליידער איז זי עטליכע חדשים צוריק באטראפן געווארן פון די ביטערע מחלה ה"י אויף א שווערע פארנעם, און דעם פרייטאג נאכמיטאג א קורצע צייט בעפאר כניסת השבת האט זי צוריקגעגעבן איר ריינע נשמה ליוצרה, איבערלאזנדיג א הערליכע דור, חשובע קינדער און אייניקלעך, דארונטער עטליכע קינדער נאך אינדערהיים, און א כלה אין שטוב.
די לוויה קומט פאר היינט מוצאי שבת 9:00, ביי ביהמ"ד זידטשויב פרעמיסלא אויף אמת לעין אין מאנסי.
