כ"ק אדמו"ר מסאטמאר שליט"א וועלכער איז אנגעקומען אויף די געהויבענע מסע הקודש קיין ארץ ישראל, וועט היינט פיר אזייגער נאכמיטאג אויפטרעטן מיט א שיעור אין כולל שומרי החומות, בהיכל ביהמ"ד צעהלים אין בנין ישיבת כתב סופר אין די אונגארישע הייזער. שפעטער אין טאג וועט דער רבי שליט"א באשיינען די מעמד הכנסת ספר תורה וואס ווערט אריינגעגעבן צום סאטמארער בית המדרש אויף רחוב חגי אין ירושלים, און באזוכן בקרב תלמידי המוסדות אין ירושלים.
כ"ק אדמו"ר מפשעווארסק שליט"א וועט היינט פארמיטאג ארויספארן קיין פיטע האלאנד, צו פוקד זיין דעם ציון הק' פון אביו הרה"ק רבי יענקעלע מפשעווארסק זי"ע לרגל די הילולא קדישא, אויפן בית החיים דקהל מחזיקי הדת.
כ"ק אדמו"ר מפיטסבורג שליט"א וועלכער איז צוגאסט די טעג אין ניו יארק לטובת מוסדותיו הקדושים, קומט היינט אן קיין בארא פארק וואו דער רבי וועט אויפנעמען די חסידים, אין שטוב פון הנגיד ר' בנימין קאר הי"ו.
כ"ק אדמו"ר מבאסטאן ביתר שליט"א וועלכער האט געוויילט די לעצטע צוויי וואכן אין אמעריקע לרגל עטליכע שמחות, קערט זיך היינט צוריק למעונו אין ארץ ישראל.
היינט קומט פאר די מעמד כבוד התורה בחצר הקודש תולדות אהרן, סיום מסכתות קידושין און בבא מציעא וחלוקת תעודות פאר די תלמידי הישיבה, אינעם גרויסן היכל פון ישיבת תולדות אהרן אין שטאט אלעד, אין שפיץ פון כ"ק אדמו"ר מתולדות אהרן שליט"א.
היינט קומט פאר די שמחת הבר מצוה פון א זון ביי הגה"צ ר' ישראל יעקב לעמבערגער שליט"א אבד"ק מאקאווא ב"ב, איידעם ביי הגה"צ גאב"ד קוממיות זצ"ל, אין ביהמ"ד מאקאווא אויף רחוב רבינו תם אין בני ברק.
עס איז געשלאסן געווארן די שידוך פון א אייניקל ביי כ"ק אדמו"ר ממעליץ שליט"א, אייניקל פון בנו הגדול הגה"צ ר' ברוך הורוויץ שליט"א דומ"ץ מעליץ, די חתן א זון פון זיין זון הגה"צ ר' משה מנחם הורוויץ שליט"א, מיט די כלה א טאכטער פון הגה"צ ר' יעקב הערש אויש שליט"א, זון פון הגה"צ ר' עמרם אויש שליט"א מלופעני, און איידעם ביי הגה"צ ר' יחיאל וואגשאהל שליט"א אבד"ק תפארת משה.
עס איז געשלאסן געווארן די שידוך פונעם חתן א זון פון הגה"צ ר' בעריש קליינמאן שליט"א, זון פון הגה"צ אבד"ק מארגארעטען זצ"ל, און איידעם ביי הגה"צ ר' ישראל דאכנער שליט"א אבד"ק בערמעהט, מיט די כלה א טאכטער פון הגה"צ ר' מאיר ראטטענבערג שליט"א, זון פון כ"ק אדמו"ר מוואוידיסלאוו זצ"ל, און איידעם ביי הגה"צ ר' יחיאל וואגשאהל שליט"א אבד"ק תפארת משה.
ניחום אבלים:
צו די פטירה פון הרבנית הצדיקת מזידטשויב פרעמיסלא ע"ה, זיצן שבעה די בני המשפחה אין איר שטוב אויף גראוו סטריט אין מאנסי, בעלה הגדול כ"ק אדמו"ר מזידטשויב פרעמיסלא שליט"א און זיינע קינדער, איר פאטער הגה"צ ר' יחזקי' יעקב פיש שליט"א אבד"ק סאלקא און זיינע קינדער.
אריינצושיקן מודעות און נייעס, שיקט אן אימעיל צו NEWS@JDNMAIL.COM
