דעם אנהייב וואך פרשת תולדות, האבן די הונדערטער תלמידי וחסידי סאטמאר בארץ הקודש זוכה געווען צו מקבל זיין פני רבם ומאורם כ"ק אדמו"ר מסאטמאר שליט"א, וועלכער איז אנגעקומען אויף א געהויבענע מסע הקודש בקרב חסידיו ומעריציו אין ארץ ישראל, ווען צום הויכפונקט וועט געפראוועט ווערן א געהויבענע שבת אין אתרא קדישא מירון במעמד אלפי חסידים ואנשי מעשה.
דער רבי שליט"א האט זיך ארויסגעלאזט על אם הדרך מוצאי שבת קודש, נאכן באשיינען די שמחת הבר מצוה פון א אור אייניקל אין קרית יואל. אונטערוועגנס האט זיך דער רבי שליט"א אפגעשטעלט אויף איין טאג אין אטענס גריכנלאנד, זיך אפצורוען פונעם טורח הדרך, און אנשעפן פרישע כוחות צום פארנומענעם ימי הביקור בארץ הקודש.
זייענדיג אין גריכנלאנד פון זונטאג נאכמיטאג ביז מאנטאג פארמיטאג, האט דער רבי שליט"א שפאצירט אויף די ארטיגע גאסן אינאיינעם מיט די מקורבים, און געדאווענט די תפילות אינעם לאקאלן בית חב"ד. מאנטאג פארמיטאג איז דער רבי ארויסגעפארן מיט א פריוואטע פליגער, און געלאנדעט אין ארץ ישראל וואו עס האבן אפגעווארט צענדליגע פני העדה פון די סאטמארע קהילות אין ארץ ישראל, און א ספעציעלע דעלעגאציע פון די עדה החרדית.
נאך וואס די ערשטע טעג פון די מסע המרומם איז געווידמעט פאר די חסידים תושבי ירושלים עיר הקודש, איז דער רבי ארויסגעפארן באלד פונעם לופטפעלד קיין ירושלים, און צוערשט ארויף אויף א באזוך אין שטוב פונעם פוסק הדור מרא דארעא קדישא שליט"א, במעון תורתו אין די הר נוף געגנט. דער פוסק הדור האט מקבל געווען דעם רבי'ן בכבוד הראוי, און האט ארויסבאגלייט דעם רבי'ן אין א אומגעווענליכע שריט.
פון דארט איז דער רבי שליט"א אנגעקומען צום הויפט לשכת העדה החרדית אין די בניני זופניק, וואו עס איז פארגעקומען א באשיידענע קבלת פנים לכבודו, מיט די באטייליגונג פון אלע חברי הביד"ץ די שרי התורה, עס האט אויפגעטרעטן דער ספרא דדיינא הרב יצחק שלמה בלויא שליט"א, הגה"צ ר' יהושע ראזענבערגער שליט"א חבר הביד"ץ וגאב"ד קרית הרמ"א אין בית שמש, הגה"צ ר' אברהם יצחק אולמאן שליט"א חבר הביד"ץ, און מען האט געהערט דברות קודש פונעם רבי'ן שליט"א.
דאן איז דער רבי שליט"א אנגעקומען לבית האכסניא ביי הנגיד החסיד ר' בערל קארניאל הי"ו אין ירושלים, און נאך מעריב איז דער רבי אנגעקומען צום גרויסן שאטער אויף רחוב דורש טוב, וואו עס זענען שוין געווען פארזאמלט טויזענטער חסידים צום גרויסן מעמד קבלת פנים רבתי, קאמבאנירט מיט די מעמד סיום כתיבת האותיות, פאר די ספר תורה וואס איז אריינגעגעבן געווארן צומארגנס דינסטאג אין סאטמארער בית המדרש אויף רחוב חגי אין ירושלים.
דער רבי האט זיך באגריסט מיט די רבנים אויפן אויבן אן, און מען האט פאר לענגערע מינוטן געטאנצן אויף די הויכשטאקיגע פארענטשעס. דער רבי שליט"א האט אויפגעטרעטן מיט רירנדע דברות קודש בצפיה לגאולה, און דערנאך האט דער רבי אריינגעשריבן די לעצטע אותיות אינעם ספר תורה, און זיך אויפגעשטעלט אויף א פייערדיגן ריקוד מיטן ספר תורה.
דורכאויס די נאכט האט דער רבי שליט"א באזוכט אין שטוב פון הגה"צ ר' יעקב מאיר שעכטער שליט"א, וואו עס איז פארפירט געווארן א שיינער שמועס בדברי תורה וסיפורי צדיקים. א באזוך בביתו נאוה קודש פון כ"ק אדמו"ר מגור שליט"א, א באזוך ביים שוואגער כ"ק אדמו"ר מבעלזא שליט"א וועלכער האט אויפגענומען דעם רבי'ן אין די בית תפילה אויף א גרעסערע און מער חשובע פארנעם, א באזוך ביי מחותנו כ"ק אדמו"ר מקרעטשניף שליט"א פון ירושלים, און א באזוך אין שטוב פון הגה"צ ר' משה טייטלבוים שליט"א דומ"ץ סאטמאר ירושלים.
היינט אינדערפרי האט דער רבי געדאווענט בבית מדרשו אין ירושלים, וואו עס האבן מיטגעדאווענט מיטן רבי'ן די ילדי התלמוד תורה. נאכן דאווענען איז פארגעקומען א מסיבת לחיים, און דורכאויס די פארמיטאג שעות האט דער רבי באזוכט אין אלע קלאסן אין תלמוד תורה, באגריסנדיג די תלמידים מיט א ווארעמע און ליבליכע שמייכל.
אין די פריע נאכמיטאג שעה'ן איז דער רבי אנגעקומען צום בנין פון כולל שומרי החומות ביי ביהמ"ד צעהלים, נאך וואס די חברי הנהלה פון כולל שומרי החומות האבן געלאדנט דעם רבי'ן איבערצוגעבן א שיעור כללי אין כולל. דער רבי האט צוערשט באזוכט אין די תלמוד תורה, און דערנאך אנגעקומען צום היכל הכולל, זיך מתעטף געווען בטלית און אויפגעטרעטן מיט א לענגערע פלפול בשעשועי דאורייתא, נאך קורצע ווערטער דורך הגה"צ ר' יהושע ליבערמאן שליט"א ראש ישיבת שומרי החומות, וועלכער האט אנטפאנגען דעם רבי'ן בכבוד הראוי.
נאכן שיעור אין כולל שומרי החומות, איז דער רבי אנגעקומען אויף א באזוך ביי כ"ק אדמו"ר מתולדות אברהם יצחק שליט"א לרפואה שלימה. דאן איז דער רבי אנגעקומען באשיינען די מעמד הכנסת ספר תורה צום סאטמאר'ן בית המדרש, און אפגעראכטן די ריקודין בשלהבת אש קודש. דערנאך האט דער רבי אנגעהויבן אויפנעמען דעם ציבור חסידים תושבי ירושלים מיט קוויטלעך פאר לענגערע שעות.
אין לויף פון די קומענדיגע טעג ביז ענדע וואך פרשת ויצא, וועט דער רבי באזוכן בקרב חסידיו אין בית שמש און בני ברק, און פראווענען א היסטארישע שבת אין אתרא קדישא מירון.
