אקיטשאבי, פלארידא – דעם פארגאנגענעם מיטוואך פרשת חיי שרה וועט פארצייכנט ווערן מיט גאלדענע בוכשטאבן אין די היסטאריע פון יהדות אמעריקא, אלס דער טאג וואס אקיטשאבי איז געווארן לעיני כל פון א חלום אין א פלאן, ביז א הערליכע רעאליטעט, ברעכנדיג די אכציג יעריגע היסטאריע פון אידישע שטעט על אדמת אמעריקא, אלס דער ערשטער נייע אידישע שטאט געבויט פון א ליידיגער פוסטער באדן, ביז א הערליכע רחבות'דיגע חסיד'ישע שטאט מיט אלע צוגעהערן.
יהדות אמעריקא האט נאך זייט איר עקזיסטענץ נישט בייגעוואוינט אזא פינאמענאן אז עס ווערט געבויט א ריזיגער נוטראלער חסיד'ישע שטאט, געווידמעט בלויז פאר ערליכע חסיד'ישע משפחות יראים ושלמים, מסלתם ומשמנם פון כלל ישראל, צו האבן א פלאץ וואו אויפצוציען די קינדערלעך ריין פון די שמוץ פון די שטאטישע גאסן, און מיט אלע באקוועמליכקייטן און צוגעהערן וואס פארלאנגט זיך צו קענען וואוינען מיט הרחבת הדעת און קענען מחנך זיין די קינדערלעך על דרך ישראל סבא אומגעשטערט.
דער היסטארישער באזוך האט זיך אנגעהויבן מיטוואך צופרי ווען עס האבן געלאנדעט אין וועסט פאלם ביעטש לופטפעלד מערערע פארפעלקער פון די ערשטע אפליקאנטן פון לעיקפראנט באגלייט דורך די דעוועלאפערס, ארכיטעקטן, עסקנים, רבנים, וראשי המוסדות פונעם נייעם שטאט, צו געבן א געלעגנהייט פאר אלע אינאיינעם בייצואוואוינען דעם היסטארישן מאמענט, און קענען זען מיט די אייגענע אויגן וויאזוי דער פלאן ווערט פארווירקליכט און וויאזוי דער שטאט קומט צושטאנד.
ווי נאר דער באס מיט אלע באזוכער האט זיך איינגעדרייט אויף רמב"ם בולעווארד, די הויפט גאס אין לעיקפראנט, האט א געוואלדיגער התרגשות איבערגענומען די אלע אנוועזנדע, זעענדיג מיט די אייגענע אויגן וויאזוי די הערליכע הייזער שטייען גרייט, גאנצע גאסן שלענגלען זיך מיט די פראכטפולע נייע הייזער אויסגע'שורה'ט אויף די זייטן, עס איז שוין נישט קיין חלום מער, עס איז ווירקליך רעאליטעט. וואס לענגער דער באזוך האט געדויערט, אלס מער איז די עקסטאז געשטיגן ביים ציבור, איינזאפנדיג די באצויבערנדע סצענעס איינס ביי איינס.
דורכאויס דעם באזוך האבן אלע באטייליגטע געהאט א געלעגנהייט ארומצופארן אויף די פארטיגע גאסן פון לעיקפראנט, פונעם הויפט גאס רמב"ם בולעווארד, צו די זייטיגע גאסן פון רש"י דרייוו, אא"וו. זיי האבן געקענט אריינגיין אין די מאדעל הייזער, און זען מיט די אויגן ווי גרויס און מאיעסטעטיש די צימערן זענען, ווי רחבות'דיג די גאסן זענען, ווי געשמאק די גארטנס זענען ארום די הייזער מיט די הערליכע טייטל ביימער און אנדערע טראפישע געוויקסן, און ווי אנגענעם עס איז ארומצושפאצירן אין די ווארימע קלימאט אויף די ברייטע גאסן און ארום די הערליכע לעיקס.
די באטייליגטע האבן געהאט די געלעגנהייט צו הערן פונעם ראש המוסדות הרב ר' אברהם דוב עהרנטאל שליט"א איבער אלע אנטוויקלונגען וואס אנבעלאנגט די מוסדות התורה והחינוך, זיי האבן געהערט פון הרה"ג רבי זושא אויש שליט"א א חבר וועד הרבנים ד'לעיקפראנט, וועלכער האט מיטגעטיילט די עבודה קשה שבמקדש וואס די וועד הרבנים לייגט אריין צו פארזיכערן אז דער שטאט ווערט אוועקגעשטעלט אויף הייליגע יסודות און אז אלע אידישקייט ענינים ווערן אוועקגעשטעלט על צד היותר טוב למהדרין מן המהדרין.
ווי אויך האט מען געהאט א געלעגנהייט צו הערן פון ר' דוד ברעשער הי"ו, א באנקיר וועלכע האט אוועקגעשטעלט ספעציעלע גאר ביליגע מארטגעדש אפציעס, מיט גאר נידעריגע דאון-פעימענטס כדי צו פארזיכערן אז יעדער זאל זיך קענען ערלויבן צו קויפן א הויז, לויט זייערע מעגליכקייטן.
דער שעריף פון גלעידס קאונטי איז אויך געקומען אנטייל נעמען ביי דעם היסטארישן באזוך, און מיטגעטיילט מיט די פארזאמלטע אז די שכינות'דיגע באפעלקערונג קוקט גאר שטארק ארויס אויפן אנקום פון די חרדי'שע איינוואוינער, און אז ב"ה מען הערט נישט און מען זעט נישט אינעם גאנצן געגנט קיין זכר פון שנאה אדער אנטיסעמיטיזם, און האט גאר שטארק פארשפראכן אז ער און זיי אגענטור וועלן נישט דולדן קיין שום אנטיסעמיטיזם אויב עס וועט זיך יא מאכן, און זיי וועלן טון אלעס וואס זיי קענען צו פארזיכערן די וואוילזיין פון די אידישע איינוואוינער.
די עסקנים און דעוועלאפערס האבן ארום געוויזן פאר די באזוכער די שטחים וואו עס וועט זיך אי"ה אין די קומענדיגע וואכן אנהייבן די מאסיווע בוי ארבייט אויפן גיגאנטישע בנינים פון די ביהמ"ד, מקוה, תלמוד תורה, מיידל סקול, די סופערמארקעט און די שאפינג פלאזא. די אלע בנינים אינאיינעם מיט די ערשטע הונדערט זעקס און ניינציג (196) הייזער, וועלן אי"ה זיין פארטיג אויפן תחילת שנת הלימודים תשפ"ז לפ"ק, ווען די ערשטע קרוב צו צוויי הונדערט תושבים וועלן זיך אי"ה אריינציען קיין לעיקפראנט בשעטו"מ.
נאכמיטאג, האבן זיך אלע באטייליגטע פארזאמלט אויפן שטח הביהמ"ד וואו מען האט אפגעראכטן א תפלת מנחה מיט א געוואלדיגע התרגשות, ווען תיכף נאך מנחה האט זיך דער ציבור ארויסגעלאזט אין הילכיגע ריקודים, זינגענדיג בנה ביתך כבתחלה וכונן מקדשך על מכונו. און דארט איז אנאנסירט געווארן אז אין די קומענדיג וואכן וועט אי"ה פארקומען אן הערליכער מעמד הנחת אבן הפינה. די פונקטליכע דעטאלן וועלן אי"ה בקרוב פארעפנטליכט ווערן.
אלע פארזאמלטע זענען פה אחד ארויסגעגאנגען פון התפעלות אויף שריט און טריט זעענדיג די היסטארישע פארשריט פאר די אויגן, מען האט שוין נישט געדארפט גלייבן די רעקלאמעס, מ'האט זיך נישט געדארפט פארלאזן אויפן ווארט פון די דעוועלאפערס, אדער פון די עסקנים, מען האט עס געזען מיט די פליישיגע אויגן, און דער ציבור איז געבליבן פארגאפט.
עס האט טאקע נישט לאנג גענומען, ביז עטליכע שעה, ווען די ווארט איז ארויס אין די גאס פון דעם היסטרישן באזוך, האבן זיך די טעלעפאנען אין לעיקפראנט אפיסעס גענומען קלינגען אן אויפהער, אין די ערשטע 24 שעה, איז שוין געווען 1100 מעסעדזשעס פון אידן וועלכע זענען געווען ערנסט פאראינטרעסירט זיך אריבער צו ציען קיין לעיקפראנט, און געוואלט מער אינפארמאציע.
צווישן די רופער זענען געווען אזעלכע וועלכע האבן אויך געוואלט וויסן אויב עס איז מעגליך יעצט צו קויפן פאר וואקאציע הייזער, פאר אינוועסטמענט, אדער צו פארדינגען פאר אנדערע. דעריבער האבן זיי געמוזט ארויסלייגן אן הודעה, אז אין די ערשטע צוויי פאזעס, וועלן די הייזער פארקויפט ווערן בלויז פאר משפחות וועלכע וועלן זיך גענצליך ארויסציען קיין לעיקפראנט און נישט פאר קיין צייטווייליגע איינוואוינער אדער וואקאציע הייזער, און אויך נישט צו פארדינגען.
פאר מער אינפארמאציע איבער די הייזער, אדער איבער די קומענדיגע טורס אין לעיקפראנט קען מען זיך פארבינדן מיטן אפיס אויף 863-333-9400.
