דעם פרייטאג צונאכטס האבן תלמידי וחסידי סאטמאר מיטגעהאלטן א זעלטענע איבערלעבעניש, ווען בעפאר קבלת שבת איז כ"ק אדמו"ר מסאטמאר שליט"א ארויף אויף די טרעפן פון די ארון הקודש, און משמיע געווען פייערדיגע דברות קודש איבער די הייליגקייט פון דעם מקום קדוש, בית מדרשו של רבי וואס איז שוין מקודש אזויפיל יארן, און אצינד דארף מען שטארקע הילף צו פארענדיגן דעם גרויסן ביהמ"ד בתכלית היופי.
דער רבי שליט"א האט אנגעהויבן זיינע ווערטער בגודל קדושת המקום, שטייענדיג אין דעם הייליגן בית המדרש וואו הרה"ק מסאטמאר זי"ע האט געפראוועט די עבודת הקודש בחיים חיותו, דער מקום קדוש וואו טויזענטער אידן דאווענען און לערנען שוין צענדליגע יארן, און האט אזוי וויכטיג געדארפט פארגרעסערט און פארשענערט ווערן לרווחת הציבור.
דער רבי האט ערווענט אז ער האט געבעטן די עסקנים זיך אריינצולייגן אין דעם אונטערנעמונג צו מרחיב זיין די גבולי הקדושה, און אז ער זעלבסט האט זיך אונטערגענומען צו שטיין די עסקנים צו הילף, אז געלט זאל נישט זיין קיין עיכוב. דאן האט דער רבי זיך געוואנדן צו די חסידים מיט א הייסע בקשה, אז יעדער וואס וויל האבן א חלק אין די השראת השכינה אויף דעם מקום קדוש זאל נעמען א חלק דערין, און צוהעלפן די ווייטערדיגע ארבעט לפאר ולרומם את בית ה'.
