פארלאפענעם מוצאי שבת קודש איז אפגעצייכנט געווארן א היסטארישע אנטוויקלונג אינערהאלב די מוסד בוני עולם, וואס שטעלט צו אלוועלטליכע הילף פאר אחינו בני ישראל וואס זענען אנגעוויזן אויף א ישועה געהאלפן צו ווערן מיט זרע של קיימא, מיטן באנייאונג פון די פראכטפולע לאקאלע אפיס געביידע אין מאנסי, צו סערווירן די תושבי העיר והגלילות מיט א אויסערגעווענליכע געטריישאפט.
די שפאגל נייע געביידע איז אהערגעשטעלט געווארן גאר עלעגאנט, און אויף א פריוואטע פארנעם וואס זאל דינען די אינטערעסן פון אלע אידן וואס זענען אנגעוויזן דערויף, פריוואטע אריינגענג און פארקינג ערטער, צען הערליכע אפיסעס און א צאל קאנפרענץ צימערן, וואו דאקטוירים זאלן זיך קענען טרעפן מיט עסקנים, וואו די איבערגעגעבענע קאונסלער'ס זאלן זיך קענען טרעפן מיט אידישע פארפעלקער, און וואו די געטרייע עוסקים במלאכת הקודש צו העלפן אידישע קינדער זאלן קענען דורכפירן די נויטיגע טעסטס צו באגלייטן יעדן ביז צום געוואונטשענעם מאמענט.
א הערליכע מעמד קביעת מזוזה און מסיבת לחיים איז פארגעקומען מוצאי שבת קודש אין די נייע אפיסעס, וואו עס האבן זיך באטייליגט מערערע רבני העיר פון אלע שיכטן און קרייזן, און האבן אלע אייניג אויסגעדרוקט התפעלות פון די געוואלדיגע איבערגעגעבנקייט פאר די תושבי העיר. אזוי אויך האט מען ספעציעל באעהרט הרבני הנגיד ר' אברהם פנחס קליין הי"ו וב"ב, וועלכער האט מנדב געווען די נייע געביידע לעילוי נשמתם פון זייערע עלטערן, און הרבני הנגיד ר' יונה שלאמיוק הי"ו וועלכער האט געארבעט די לעצטערע חדשים אהערצושטעלן די געביידע מיט גרויס געטריישאפט.
