פארגאנגענעם שבת קודש פרשת וישלח איז געעפנט געווארן א נייע בית המדרש אין די סאפפערן געגנט אין מאנסי, ביהמ"ד "אבן ישראל קראקא", אויפן נאמען פון די גדולים און צדיקים וואס האבן געוואוינט אין שטאט קראקא ושם מנוחת כבודם.
די בית המדרש שטייט בנשיאות הרה"ג ר' שלום כהנא שליט"א פון די באקאנטע עסקנים אין שטאט מאנסי, א זון פון כ"ק אדמו"ר מנצח מנחם ספינקא שליט"א, און א איידעם ביי הגה"צ ר' נפתלי שפיגל שליט"א מפאריצק פון בארא פארק.
די ביהמ"ד געפונט זיך א שפאן אוועק פון די באקאנטע סאפפערן שפיטאל, וואו פילע אידן האלטן זיך אויף פאר שמחות און חלילה פארקערט, און די פאקט אז עס געפונט זיך א געשמאקע שוהל מיט א מקוה אין די געגנט איז א גרויס דערלייכטערונג פאר חולי ישראל ומשמשיהם.
צום ערשטן שבת האט דער רב שליט"א אויפגעטרעטן מיט א דרשה בעפאר קבלת שבת, אויסשמועסנדיג די יסודות פון די קהילה, און די קבלות טובות פון די מתפללים וחברי הקהילה נישט צו רעדן ביים דאווענען, זיך צו מקשר זיין צו די הייליגע צדיקים פון קראקא, צווישן זיי דער הייליגער תוספות יום טוב זי"ע וואס האט מרעיש עולמות געווען דערויף ווי באקאנט.
שבת אינדערפרי נאכן דאווענען איז געפראוועט געווארן א קידושא רבא צום פתיחת בית המדרש, און עס זענען געקומען פילע אידן און רבנים פון די ארומיגע געגנטער זיך מיטצופרייען מיט די נייער קהילה.
