אין די יעצטיגע טעג איז באשטעטיגט געווארן גאר פרייליכע נייעס פאר די חרדישע אידנטום אין מאנטשעסטער ענגלאנד, אז מען וועט האבן די זכיה מיטצולעבן א געהויבענע סקולענער שבת, ווען כ"ק אדמו"ר מסקולען שליט"א פון ירושלים וועט צום ערשטן מאל פראווענען א שבת אין שטאט במעמד קהל רב, א שבת וואס איז ערווארטעט אריינצובלאזן טללי תחיה אין די גאנצע אומגעגנט.
דער סקולענער רבי שליט"א פון ירושלים האט שוין געפראוועט א שבת אינעם דערנעבענדיגן לאנדאן מיט עטליכע יאר צוריק, א שבת וואס ליגט נאך גוט איינגעקריצט ביי די טויזענטער תושבי העיר וואס האבן נהנה געווען ביי די תפילות און טישן אויפן סקולענער שטייגער, אצינד וועט דער רבי ווידער פראווענען א שבת אין ענגלאנד, דאסמאל אין שטאט מאנטשעסטער, וואו עס איז אויך ערווארטעט א גרויסע ציבור געסט פון לאנדאן וואס וועלן קומען מיטהאלטן דעם שבת.
די נסיעה איז באשטימט אויף שבת קודש פרשת בשלח שבת שירה, ווען דער רבי וועט מופיע זיין בשערי העיר און פראווענען דעם שבת אין די גרויסע בית יעקב זאל אין שטאט, און האבן די אכסניא אין שטוב פון הנגיד החסיד ר' משה צבי ראטבארד הי"ו. דער רבי וועט פארבלייבן עטליכע טעג אין שטאט, און דערנאך פארזעצן די נסיעה קיין לאנדאן, צו באשיינען די שמחת החתונה בבית גיסו, הגה"צ ר' שמעון יוסף שטערן שליט"א ראש ישיבת אור החיים, איידעם ביים רבינ'ס שווער און שוואגער הגה"צ ר' חיים דוב שטערן שליט"א אבד"ק סקולען בני ברק.
