חסידי צאנז קלויזענבורג אין ארץ ישראל האבן אויפגענומען מיט פרייד די מעלדונג פון הרחבת גבולי הקדושה, אז צום קומענדיגן לערן יאר שנת תשפ"ז וועט געעפנט ווערן א נייער תלמוד תורה אין בני ברק פאר חסידי צאנז קלויזענבורג, און פאר אנדערע חסידישע משפחות וואס ווילן מחנך זיין זייערע קינדער על דרך ישראל סבא בשמירה יתירה קעגן די היינטיגע נסיונות.
דאס קומט נאכדעם וואס בברכתו ובעידודו פון כ"ק אדמו"ר מצאנז קלויזענבורג שליט"א האט די הנהלת הקהילה והמוסדות אפגעקויפט א גרויסן בנין אויף רחוב בן יעקב, און דער רבי שליט"א זעלבסט איז ארומגעפארן איבער שטעט און דערפער צו מתרים זיין די חסידים צו נעמען א טייל אין דעם גרויסן אונטערנעמונג.
אצינד גרייט מען זיך צום עפענונג פון די נייע תלמוד תורה וואס וועט פלאצירט ווערן טאקע אין דעם בנין, און עס וועט זיין געאייגענט בלויז פאר אזעלכע שטיבער וואס טוען זיך גענצליך אפשיידן פון טעכנעלאגישע באנוץ, צו געבן א ריינעם חינוך מיט א פארשטערקערטע שמירה בקדושה ובטהרה.
