היינט פארמיטאג איז באשטעטיגט געווארן אז כ"ק אדמו"ר מדזיקוב וויזניץ שליט"א וועלכער איז צוגאסט די טעג אין ניו יארק, וועט פראווענען א פולער שבת אינאיינעם מיט שאר בשרו כ"ק אדמו"ר מוויזניץ שליט"א פון וויליאמסבורג, אין ביהמ"ד הגדול דקהל תורת חיים וויזניץ אין וויליאמסבורג.
כ"ק אדמו"ר מדזיקוב וויזניץ שליט"א וועלכער איז א דאפלטער אייניקל פון הרה"ק בעל אמרי חיים מוויזניץ זצ"ל, מצד אמו ומצד חמותו, זייענדיג א זון און א איידעם פון די צוויי איידימער פון הרה"ק בעל אמרי חיים זצ"ל, הרה"צ רבי נפתלי חיים אדלער זצ"ל מדזיקוב וויזניץ, און הרה"צ רבי משה ארנסטר זצ"ל, פירט אן זיין שיינעם הויף לבית דזיקוב וויזניץ אין בית שמש, אויפן דרך פון זיינע גרויסע זיידעס צדיקי בית וויזניץ. דער רבי שליט"א געפונט זיך אצינד צוגאסט אין ניו יארק אויפצוטרייבן גרויסע געלטער לטובת די קרן הבנין פון די נייע ביהמ"ד הגדול דזיקוב וויזניץ אין בית שמש, און האט געפראוועט דעם לעצטן שבת אינעם עיר ואם בישראל בארא פארק.
אצינד איז באשטעטיגט געווארן אז דער רבי שליט"א וועט זיין צוגאסט דעם שבת קודש פרשת וארא אין שטאט וויליאמסבורג, און צום ערשטן מאל פראווענען א פולער שבת אינאיינעם מיט איינער פון זיינע קרובים ממשיכי השלשלת לבית וויזניץ. דאס רעכנט אריין אלע תפילות און טישן דורכאויס שבת, וואס וועט געפראוועט ווערן בשבת אחים גם יחד אין ביהמ"ד הגדול וויזניץ אין וויליאמסבורג.
די עסקנים בחצר הקודש וויזניץ אין וויליאמסבורג האבן זיך אריינגעלאזט אצינד אין די ארבעט צוצושטעלן דעם גאנצן שבת כראוי וכיאות, און פלאצירן די פילע געסט וואס וועלן קומען מיטהאלטן דעם אחדות'דיגן שבת בצל הקודש.
