דורכאויס א באשיידענע מסיבה בביתו נאוה קודש פון כ"ק אדמו"ר מדושינסקיא שליט"א מיט די חברי הקהילה פון עיה"ק צפת, האט דער רבי שליט"א איבערראשט די חסידים זאגענדיג אז ער נעמט אויף א רב און מורה צדק פאר די קהילה, הרה"ג ר' יעקב חנני' רייזנער שליט"א פון די חשובע תלמידי חכמים בחצר הקודש דושינסקיא.
די חסידים פון עיה"ק צפת זענען אנגעקומען קיין ירושלים מיטצוהאלטן א שיינע סעודת ראש חודש בצל הקודש פונעם דושינסקיא רבי'ן שליט"א, אפצוצייכענען גאנצע צען יאר זינט די קהילה אין צפת איז געגרינדעט געווארן, אין חודש שבט תשע"ו.
דער רבי שליט"א האט אויפגעטרעטן מיט דברות קודש פאר די חברי הקהילה, און געזאגט אז ער נעמט אויף הרה"ג ר' יעקב חנני' רייזנער שליט"א אלס רב און מורה צדק אין די קהילה, זאגענדיג אז ער איז מושלם בהוראה ושימוש תלמידי חכמים, און עס איז געקומען די צייט אים צו באקרוינען בכתרה של תורה, דער רבי האט צוגעלייגט אז א גרויסע מעמד הכתרה וועט בעז"ה פארקומען אין די נאנטע צוקונפט.
דער רבי שליט"א האט ערווענט אז ער האט נישט געהאט קיין שום פלאן איבער די אויפנאמע, אבער אצינד האט ער באשלאסן אויפצונעמען דעם רב לכהן פאר צו שטיין אין שפיץ פון די קהילה.
דער נייער רב איז א זון פון הרב החסיד ר' מרדכי רייזנער הי"ו מחשובי חסידי דושינסקיא, און א איידעם ביי הרב החסיד ר' יעקב קויפמאן הי"ו מנכ"ל מוסדות בוהוש.
