מיט שווערע געמיטער האבן פילע אידן בירושלים של מעלה באגלייט היינט למנוחות, הרבנית הצדיקת מרת חנה אסתר טווערסקי ע"ה, אלמנת הרה"צ רבי וועלוויל טווערסקי זצ"ל מראחמיסטריווקא, וועלכע האט זוכה געווען צו זעהן עולמה בחייה, בנין וחתנין רבנן אדמורי"ם ורבנים, אייניקלעך און אור אייניקלעך און אור אור אייניקלעך בליעה"ר לשם ולתפארת.
די רעבעצין ע"ה איז געווען א טאכטער פון כ"ק אדמו"ר הרה"צ רבי לוי יצחק קלוגהופט זצ"ל אדמו"ר מסטרעליסק, ציענדיג א הערליכע יחוס צו פילע צדיקים וקדושים אשר מפיהם אנו חיים. בהגיעה לפירקה האט זי חתונה געהאט מיט איר חשובער מאן הרה"צ רבי וועלוויל טווערסקי זצ"ל, דער פערטער זון פון כ"ק אדמו"ר הרה"ק רבי יוחנן מראחמיסטריווקא זצ"ל, צו וועם זי איז צוגעשטאנען אלס עזר כנגדו מיט גרויס געטריישאפט צו באגלייטן זיין הרבצת התורה והוראה אלע יארן.
אין איר באשיידענעם שטוב אין ירושלים עיה"ק האט די רעבעצין ע"ה מגדל געווען א לעכטיגע דור, גאר חשובע קינדער און אייניקלעך, אדמורי"ם רבנים מפורסמים, מרביצי תורה און מורי הוראה. די לעצטע דרייסיג יאר זינט זי האט פארלוירן איר גרויסן מאן, האט זי מיט גרויס הנאה געשעפט דעם נחת פונעם לעכטיגן דור ישרים יבורך, אין שפיץ פון די דריי געהויבענע זיהן הגה"צ ר' דוד טווערסקי שליט"א אבד"ק ראחמיסטריווקא בירושלים עיה"ק, איידעם ביי כ"ק אדמו"ר מבערעגסאז זצ"ל, הגה"צ ר' נחמן יוסף טווערסקי שליט"א אבד"ק זלאטיפאלי אין מאנסי, איידעם ביי כ"ק אדמו"ר מוויזניץ זצ"ל בעל תורת מרדכי, און הגה"צ ר' אלטר משה טווערסקי שליט"א אבד"ק ראחמיסטריווקא רמה ד' בית שמש, איידעם ביי כ"ק אדמו"ר ממאחנובקא בעלזא שליט"א.
די חשובע איידימער פון די רעבעצין זענען ווי פאלגענד, הגה"צ ר' מרדכי טווערסקי זצ"ל בנו הגדול פון כ"ק אדמו"ר הרה"ק מראחמיסטריווקא זצ"ל, הגה"צ ר' אהרן גרינצווייג זצ"ל פון ירושלים, כ"ק אדמו"ר מנדבורנא ירושלים שליט"א, הגה"צ ר' יהושע זעהוואלד שליט"א אבד"ק אלטשטאט, כ"ק אדמו"ר מסקווירא מאנסי שליט"א, הגה"צ ר' יצחק אייזיק וויינבערג שליט"א בנו הגדול פון כ"ק אדמו"ר מסלאנים שליט"א, און הגה"צ ר' שמואל דוד שניאורסאן שליט"א משגיח ישיבת טשעבין. אזוי אויך לאזט די רעבעצין ע"ה איבער עטליכע אייניקלעך אדמורי"ם, דארונטער כ"ק אדמו"ר מראחמיסטריווקא שליט"א פון ס"וו, כ"ק אדמו"ר מזוועהיל שליט"א, כ"ק אדמו"ר מראדוויל שליט"א, הגה"צ אבד"ק טשערנאביל ירושלים שליט"א, און הגה"צ דומ"ץ ראחמיסטריווקא לאנדאן שליט"א. און איר איינציגע שוועסטער, הרבנית הצדיקת מקאלוב תליט"א, אשת חבר כ"ק אדמו"ר מקאלוב שליט"א לרפו"ש.
די לוויה איז פארגעקומען היינט נאכמיטאג ביי איר שטוב אויף רחוב חנה אין ירושלים, דערנאך ביי ביהמ"ד הגדול ראחמיסטריווקא אויף רחוב גבעת משה, און דערנאך איז זי געקומען לקבורה אויפן הר הזיתים.
זייענדיג א חשובע מיוחסת, און א קרוין פאר א הערליכע רעבישע משפחה, האט די רעבעצין זוכה געווען זיך צו משדך זיין מיט צענדליגע גדולי אדמורי"ם ורבנים דורכאויס די יארן, צווישן די פילע אדמורי"ם החיים אתנו וואס זענען א מחותן, ציילן זיך כ"ק האדמורי"ם מסקווירא, וויזניץ, תולדות אהרן, מאחנובקא בעלזא, סלאנים, וויזניץ קייאמישא, וויזניץ וומס"ב, וויזניץ לאנדאן, וויזניץ מאנטריאל, ראחמיסטריווקא, ראחמיסטריווקא וומס"ב, ראחמיסטריווקא ס"וו, טשערנאביל, בוהוש, קאלוב, קרעטשניף, קרעטשניף י"ם, פינסק קארלין, סקווירא ב"פ, דעעש, לעלוב, מאקאווא, דזיקוב וויזניץ, טשארנאביל, פרימישלאן, קאליש, שאץ, זוטשקא, זוטשקא ירושלים, זידטשויב ווערעצקי, סטריקוב ירושלים, תולדות מרדכי, נדבורנא חיפה, אנטוניא, קאזניץ, ביקסאד, קאסאני, מעליץ, משכנות הרועים, גארליץ, חוסט, זידטשויב, ביאלא רמת אהרן, ביאלא בית שמש, ספינקא ירושלים, האלמין, טרעבישאן, און נאך פיל.
