חסידי קארלין סטאלין בארה"ב גרייטן זיך שוין בהכנה דרבה צום היסטארישן שבת חנוכת הבית וואס וועט פארצייכנט ווערן מיט גאלדענע אותיות בקורות ימי החסידות, ווען כ"ק אדמו"ר מקארלין סטאלין שליט"א וועט מופיע זיין בשערי ארה"ב צו באנייען דעם שפאגל נייע בנין ביהמ"ד הגדול דחסידי קארלין סטאלין, וואס ווערט אצינד פארענדיגט אינעם עיר ואם בישראל בארא פארק.
קארגע צוויי יאר איז פארביי זינט די מעמד הנחת אבן הפינה חודש כסלו תשפ"ה, ווען דער רבי שליט"א האט געפראוועט א שבת בקרב חסידיו אין בארא פארק, און מוצאי שבת געלייגט דעם גרונדשטיין פאר די נייע בית המדרש דחסידי קארלין סטאלין וואס ווערט געבויעט אויף די זעכצנטע עוועניו ביי די זיבן און פערציגסטע סטריט.
אין לויף פון די לעצטע צוויי יאר איז די בוי ארבעט אנגעגאנגען אויף א העפטיגע פארנעם, מיט כסדר'דיגע פארשריט לנצח על מלאכת בית ה'. אצינד ווען מען דערנענטערט זיך שוין צום גמר הבניה, איז באשטימט געווארן די דאטום פאר די גרויסע מעמד חנוכת הבית, ווען דער רבי שליט"א וועט ווידער מופיע זיין בשערי ארה"ב און פראווענען א גרויסע שבת אינעם נייעם בית המדרש, און מחנך זיין דעם בית גדול לתורה ולתפילה.
די שבת חנוכת הבית איז באשטימט געווארן אויף שבת פרשת יתרו כ"ב שבט, וואס וועט בעז"ה געפראוועט ווערן ברוב פאר והדר דורך די הונדערטער חברי הקהילה אינאיינעם מיטן רועה נאמן כ"ק אדמו"ר מקארלין סטאלין שליט"א.