נעכטן מיטוואך נאכט איז פארגעקומען א אייגענארטיגע מעמד אמירת סליחות אין די בית תפילה בביתו נאוה קודש פון כ"ק אדמו"ר מבעלזא שליט"א, וואו מען האט געזאגט סליחות לויט דעם ספרד'ישן מנהג אויפן נוסח פון די בני עדות המזרח.
ווי באקאנט האט כ"ק אדמו"ר מבעלזא שליט"א א ספעציעלע געפיל צו די ספרד'ישע סליחות, אין די פריערדיגע יארן פלעגט דער רבי אסאך גיין מיטהאלטן די דאזיגע מעמדים בעפאר די הייליגע טעג, און אצינד ווען א גרויסע קבוצה ספרד'ישע אידן וואס וואוינען אין די צפון געגנטער אין ארץ ישראל, און האבן ליידער געדארפט אנטלויפן פונדערהיים צוליב די מלחמה צושטאנד, זענען אנגעקומען אויף א באזוך אין ביהמ"ד הגדול אין קרית בעלזא ירושלים, צוגעשטעלט דורך אירגון "צוהר", איז פארגעקומען א ספעציעלע מעמד אמירת סליחות ביים רבי'ן אין שטוב.
די מעמד איז פארגעקומען מיט די באטייליגונג פון אריבער הונדערט בני עדות המזרח, מיט די פערזענליכע באטייליגונג פונעם בעלזא רבי'ן, און הגאון הגדול רבי שלמה משה עמאר שליט"א וועלכער שטייט אין שפיץ פון די ספרד'ישע קהילות.
