פון די צענטראלע בעלזא קהילה קדושה קהל מחזיקי הדת בעלזא ווערט היינט געמאלדן, איבער א היסטארישע חגיגה וואס וועט געפייערט ווערן אין צוויי חדשים ארום, חגיגה המפוארה "עשר עטרות", וואס וועט פארקומען קומענדיגן ראש חודש ניסן הבא עלינו לטובה, אין די גיגאנטישע קאמפלעקס פון "בניני האומה" אין ירושלים עיר הקודש, אין שפיץ פונעם מנהיג העדה כ"ק אדמו"ר מבעלזא שליט"א.
די גרויסע מעמד וועט ארייננעמען אין זיך מערערע פייערונגען, א בחינה פון "עשר עטרות" וואס ווערט שוין געברענגט אין חז"ל אויף דעם גרויסן טאג "ראש חודש ניסן", וואס געפאלט היי יאר זונטאג פרשת ויקרא. ביי דעם מעמד וועט אפגעצייכנט ווערן גאנצע פינף און פערציג יאר זינט די התייסדות פון קהילה קדושה מחזיקי הדת בעלזא, און די בית דין צדק דערונטער וואס איז ב"ה מצליח למעלה מן המשוער.
ביים גרויסן מעמד וועט מען האבן די זכיה צו מקבל זיין את פני הקודש פון כ"ק אדמו"ר מבעלזא שליט"א, און אינאיינעם וועט מען אפגעבן א שבח והודאה פאר די צענדליגע שנות הנהגה דורכ'ן רבי'ן שליט"א וועלכער איז משפיע אויף אלע חסידים ברוח ובגשם. מער דעטאלן איבער די גרויסע מעמד ווערן אויסגעארבעט דורך די טעטיגע עסקנים, וואס זענען איינגעשפאנט אויסצופירן די פלענער מכח אל הפועל, לרומם קרן התורה וחסידות.
