שטייענדיג א גאנץ קיילעכיג יאר זינט די שרעקליכע פייער וואס האט אויסגעבראכן אין ביהמ"ד סטאבניץ אין בארא פארק, ווען הגה"צ רבי ברוך אברהם הורוויץ שליט"א אבד"ק סטאבניץ און זיין זון זענען שווער פארוואונדעט געווארן, און זענען ב"ה צוריקגעקומען צום פולקאמען געזונט נאך א לענגערע ערהוילונג, גרייט מען זיך אויף א גרויסע סעודת הודאה וואס וועט פארקומען היינט אויפדערנאכט ליל י"ט אדר צום יארטאג פון די שוידערליכע פאסירונג.
די פייער האט פאסירט אין א פרייטאג פארטאגס י"ט אדר ב' תשפ"ד, געציילטע שעות נאך וואס דער רב שליט"א און די בני המשפחה האבן זיך אהיימגעקערט פון די חתונה פון א קינד אין א מזל'דיגע שעה. די פייער האט זיך אנגעהויבן אינעם רב'ס דירה און האט זיך שנעל פארשפרייט אין די גאנצע בנין, און אנגעברענגט ערנסטע שאדן פאר עטליכע דירות און די בית המדרש זעלבסט.
פינף זענען ליידער פארוואונדעט געווארן אין די שריפה, ווען זיי האבן נישט געהאט קיין וועג ארויס איידער די פייערלעשער זענען אנגעקומען, דער רב שליט"א מיט זיין זון הב' יהודה צבי נ"י זענען קריטיש פארוואונדעט געווארן, און זענען באהאנדלט געווארן אין די קארנעל שפיטאל מיט גאר שווערע וואונדן, ווען נאך עטליכע טעג האבן זיי זיך ב"ה ערהוילט און שפעטער אהיימגעקומען אויף א פולקאמע ערהוילונג.
שטייענדיג אצינד לתקופת השנה, וועט היינט אויפדערנאכט פארקומען א גרויסע סעודת הודאה אין ביהמ"ד סטאבניץ אויף די זעכציגסטע סטריט, וואו די חברי הקהילה מתפללי ביהמ"ד וועלן זיך מיטפרייען מיט די בעלי הנס און דאנקען און לויבן דעם בורא כל עולמים אויף די גרויסע חסדים.
