תלמידי וחסידי סאטמאר האבן אויפגענומען מיט פרייד די איבערראשנדע מעלדונג מטעם קהל יטב לב ד'סאטמאר, אז דעם קומענדיגן חול המועד פסח הבא עלינו לטובה וועט פארקומען א זעלטן היסטארישע מעמד בקורות ימי סאטמאר, מעמד פדיון פטר חמור אין שפיץ פון כ"ק אדמו"ר מסאטמאר שליט"א.
דאס קומט נאכדעם וואס עס איז געבוירן געווארן א בכור אן אייזל אין די פארם ביי א חשובער סאטמארער חסיד, וועלכער האט באשלאסן צו מכבד זיין מיט דעם זעלטענעם זכיה'דיגע מצוה כ"ק אדמו"ר מסאטמאר שליט"א. דער רבי האט אנגענומען דעם כיבוד און באשטימט דעם גרויסן מעמד פארצוקומען בעיצומו של ימי החג, אין די פרייליכע טעג פון חול המועד פסח הבא עלינו לטובה.
לויטן פלאן וועט די גרויסע מעמד פארקומען בעז"ה דאנערשטאג די דריטע טאג חול המועד, אינעם ריזן היכל בית המדרש הגדול אין קרית יואל וואס וועט ווערן אויסגעשטעלט מיט טויזענטער זיץ פלעצער פאר די טויזענטער חסידים, וואס וועלן קומען צו פארן פון אלע שטעט איבער גרעיטער ניו יארק און ניו דזשערזי מיטצוהאלטן דעם זעלטן געהויבענעם מעמד.
