מטעם בית כ"ק אדמו"ר מבעלזא שליט"א איז היינט פרייטאג נאכמיטאג געמאלדן געווארן אז לאור דעם רבינ'ס מצב הבריאות וועט דער רבי שליט"א וויילן אין שפיטאל איבער שבת, און וועט ווארשיינליך דורכגיין אן אפעראציע צו פאררעכטן א צובראכענע ביין אין די פיס.
דער רבי שליט"א האט געליטן שווערע יסורים די לעצטע פאר טעג, און נאך וואס עס איז אנטשטאנען א ערנסטע פארדאכט אז דעם רבינ'ס פוס ביין איז צובראכן, איז מען אריינגעפארן צו די הדסה שפיטאל אויף אונטערזוכונגען. היינט ערב שבת קודש איז צוריקגעקומען די רעזולטאטן וואס צייגט אויף א צובראכענע ביין, און ווי די דאקטוירים זאגן דארף מען אפערירן וואס שנעלער צו לינדערן די שמערצן וואס דער רבי שליט"א ליידט רח"ל.
מטעם בית דין צדק מחזיקי הדת דחסידי בעלזא זענען חסידי בעלזא פארבעטן געווארן צו דאווענען פארן רבינ'ס געזונט, מען זאל זאגן שיר השירים ברוב עם בעפאר קבלת שבת, און די נשים צדקניות זאלן זאגן פרקי תהלים ביים לעכט צינדן צו מעתיר זיין למען בריאתו השלימה פונעם רבי'ן, כ"ק מרן ישכר דוב בן מרים בתוך שאר חולי ישראל, דער רבי זאל צוריקקומען צו די כוחות און ווייטער קענען משפיע זיין פאר קהל עדת צאן מרעיתו מיט אריכות ימים ושנים טובים.
