די יערליכע דינער "קשר אחד" וואס קומט פאר יאר יערליך איידער חג השבועות לטובת איחוד מוסדות באבוב 45, איז אין א באדייטענדע שריט היי יאר צושפליטערט געווארן אין פיר באזונדערע דינערס, איינגעטיילט לויט די יארגענג פון די חברי הקהילה תומכי המוסדות, צעירי האברכים, צעירי בעלי בתים, עלטערע בעלי בתים און זקני הקהילה, און די מיטליעריגע אברכים ובני תורה.
די פראכטפולע עמינענס זאל אין בארא פארק, אויף די זעכצנטע עוועניו אין בארא פארק, איז ארויסגעדינגען געווארן פאר א גאנצע וואך צייט, צו דינען אלס אכסניא של תומכי תורה, פאר די פראכטפולע מעמדים וואס וועט פארקומען אין לויף פון פיר טעג, אנגעהויבן פון היינט זונטאג, ביז דעם קומענדיגן מיטוואך אויפדערנאכט הבעל"ט.
די אויבן אן וועט טעגליך באשיינט ווערן דורכ'ן נשיא המוסדות כ"ק אדמו"ר מבאבוב 45 שליט"א, און ביים פאדיום וועט טעגליך מהנה זיין דער מייסטער רעדנער הרב ישראל שטערן הי"ו פון לאנדאן אלס יושב ראש המעמדים, און דער יו"ר מגבית העולמי קשר אחד הרב בנציון יוסף ריינהאלד הי"ו.
אויסער דעם וועט יעדע נאכט אויפטרעטן א באזונדערע נואם הכבוד, איין נאכט הרה"ג ר' מאיר צוויבל שליט"א רב ביהמ"ד קדושת יו"ט סאטמאר וומס"ב, איין נאכט הרה"ג ר' יעקב משה טווערסקי שליט"א אב"ד תורי זהב הארנסטייפל, הרה"ג ר' יעקב חיים ברוך אבראמאוויטש שליט"א מראשי ישיבת גור, און איין נאכט הרה"ג ר' שלום שרגא פאפאלאנאש שליט"א מגיד מישרים.
ביים אריינגאנג צום דינער וועט זיין א ספעציעלע אויסשטעלונג איבער דאס לעבן אין שאפן פונעם באבוב'ער רבי זצ"ל.
