דער רוח טהרה וואס ווערט פארשפרייט דורך דעם באקאנטער וואוילטעטיגער ארגענעזאציע "מקוה טהרה העולמי" האט די וואך דערגרייכט צו פרישע שטאפלען ווען עס האט דערגרייכט דעם באשיידענעם קהילה וואס ווירבלט אין דעם סיבוי אינזל וואס איז א טייל פון די צענדליגער אינזלען וואס פאראייניגן זיך אלס די פילפינען, אינעם ווייטן אזיאנער קאנטינענט.
די פילפינען איז דורכאויס די לעצטיגע יארן געווארן א שטארקע דעסטענאציע פאר פילע ביזנעסער וועלכע זוכן פאר ביליגע ארבעטערס, נאך וואס די ארטיגע לעבנסשטייגער איז זייער ביליג, און מען קען דארט טרעפן ענגליש רעדנדע ארבעטערס פאר שפאט ביליג, און דאס האט געברענגט אז א צאל אידישע ביזנעסלייט זאלן זיך באזעצן אין דעם ווייטן לאנד.
דאס איז אין צוגאב צו א קליינע אידישע געמיינדע וואס איז שוין סטאנציאנירט אין די פיליפינען פאר עטליכע הונדערט יאר, און פילצאליגע טוריסטן וואס באזוכן יערליך די פילפינען וואס איז באוואוסט אלס הערליכע אטראקציע ארט, מיט גאר שיינע נפלאות הבורא.
דער ארטיגער שליח חב"ד הרב מענדל אקסלרוד שליט"א דערציילט אז אין דעם סיבוי אינזל איז פארהאן ארום צוואנציג אידישע משפחות, וואס א גרויסע טייל פון זיי גייען מיט מסירות נפש זיך טובל'ען אינעם ארטיגן טייך, און דאס איז אויסער די הונדערטער טוריסטן און ביזנעסלייט וואס קומען דורכאויס דעם גאנצע יאר.
"מקוה טהרה העולמי" וואס איז באקאנט מיט זייערע פארצווייגטע פעולות לטהרתן של ישראל, האט איינגעזען די וויכטיגקייט פון צושטעלן פאר די ארטיגע אידנטום א כשר'ע מקוה טהרה, און נאכן זיך אריינלייגן צו מסדר זיין די טעכנישע פרטים, איז דעם פארגאנגענעם וואך אפגעהאלטן געווארן דעם היסטארישן מעמד יציקת הבורות.
מען האט ספעציעל ארויסגעשיקט דעם חשוב'ער משגיח הרב שלמה אברהם פאללמאן שליט"א דיין בבית הוראה קארלסבורג, און ער געפונט זיך אונטער דעם אויפזיכט פון דעם באקאנטער מומחה בעניני מקוואות הרה"ג ר' יצחק טריגער שליט"א, און ער האט אונטערגענומען דעם רייזע צו די אנדערע עק וועלט פארנדיג 24 שעה אויפן פליגער פאר יעדע וועג, ביזן דערגרייכן די ארטיגע אידן הצמאים לדבר השם.
אנדערש ווי א געווענליכער מעמד יציקת הבורות וואס ווערט אפגעראכטן מיט פארגעשריטענע טראקטארן און צעמענט טראקס, איז עס אפגעראכטן געווארן אויף דעם ארטיגע פרומיטיווע פארנעם ווען עס זענען געשטאנען אויסגע'שורה'ט צענלדיגער ארבעטערס, וועלכע האבן אריינגעגאסן די צעמענט אינעם מקוה איינער נאך די אנדערע, און עס האט זיך פארצויגן פאר אזוי לאנג ווי צוועלף שעה.
דאס איז געטון געווארן וויבאלד אין די פילפינען איז ביליגער צו אויפנעמען צען ארבעטערס פאר צוועלף שעה, ווי צו דינגען א טראקטאר.
ווי דער חשוב'ער משגיח שליט"א וואס האט דארט געוויילט אויף שבת געבט איבער, האט ער זיך דארט באגעגנט מיט א הערליכע קהילה קדושה בישראל, און ער איז ארויס פון התפעלות זעענדיג וויאזוי אויף דער אנדערער עק וועלט געפונען זיך אויך א קבוצה פון ערליכע אידן וועלכע ווילן זיין הייליג, און ווארטן אויף א מקוה טהרה.
