חסידי באבוב 45 זענען איינגעהילט אין התרגשות ושמחה, אריינטרעטנדיג אין א פרישע יאר פון הרחבת גבולי הקדושה, ווען די יאר האט זיך אנגעהויבן מיט א פרייליכע בשורה טובה פאר די חסידים, איבער א פרישע מקח וואס איז געשלאסן געווארן אויף א גרויסן שטח פון הונדערט פיס ביי הונדערט פיס, וואס געפינט זיך הארט נעבן דעם גרויסן בנין פון די מיידל שולע אויף די 62'סטע גאס אין בארא פארק.
דאס קומט נאך א העכסט געלונגענע יאר תשפ"ד, ווען קהילת ומוסדות באבוב – 45 האט געזען אויסטערלישע סייעתא דשמיא מיטן מחנך זיין דעם נייעם בנין התלמוד תורה, דאס אפקויפן דעם שטח און שנעלע בוי ארבייט ביים בנין המתיבתא, און בעיקר די פארשריט פונעם נייעם ביהמ"ד הגדול וועלכע ווערט געבויט מיט א שנעלקייט, און אין בלויז דעם פארלאפענעם יאר אליינס איז אינוועסטירט געווארן אינעם פראיעקט אריבער 20 מיליאן דאללער.
דער אפקויף איז צושטאנד געקומען אדאנק די ארבייט פונעם ענערגישן מנכ"ל המוסדות הרב יעקב יוסף שטיינמעץ, און בעידוד ובברכת קדשו פונעם נשיא המוסדות כ"ק אדמו"ר מבאבוב – 45 שליט"א. לויט ווי עס ווערט איבערגעגעבן פון די הנהלת המוסדות וועט דער נייער שטח בעז"ה אינגיכן אריינגיין אין באנוץ פון די מוסדות.
