נעכטן מוצאי שבת ביים וועכנטליכן מלוה מלכה אין ביהמ"ד הגדול באבוב 45 אין בארא פארק, האט דער רבי שליט"א מעורר געווען די בחורים צו שניידן די פיאות און עס נישט לאזן וואקסן לענגער ווי מען דארף, גענוי ווי די פריערדיגע רבי'ס האבן זיך געפירט און מקפיד געווען דערויף.
דער רבי שליט"א וועלכער פראוועט יעדן מוצאי שבת א גרויסע מלוה מלכה, כמנהג חותנו וזקינו אדמור"י באבוב זי"ע, האט ביי די סיפורי קודש דערציילט שיינע ענינים פונעם בעל ההילולא הרה"ק משינאווא זי"ע בעל דברי יחזקאל. דאן האט דער רבי זיך געוואנדן צו די בחורים זאגענדיג אז ער האט לעצטענס באמערקט אז עס האט זיך אריינגעכאפט צווישן די בחורים אז מען לאזט זיך וואקסן לאנגע פיאות, אנדערש ווי עס האבן זיך געפירט די פריערדיגע רבי'ס אשר בצילם אנו חוסים.
דער רבי האט ערווענט אז עס זענען טאקע געווען גרויסע צדיקים וואס האבן זיך קיינמאל נישט געשניטן די פיאות, און מיר פרעגן אויף זיי נישט קיין קשיות, אבער ביי אונזערע רבי'ס איז געווען פונקט אזוי הארב דאס האבן לענגערע פיאות ווי דער שיעור, ווי דאס האבן קלענערע פיאות פונעם שיעור. איבערהויפט דער הייליגער בעל הילולא דער שינאווא'ער רב זי"ע וועלכער האט געלאזט פאלן גאר שארפע דיבורים איבער לאזן וואקסן די פיאות לענגער ווי מ'דארף.
דער רבי האט בשעת די דברות קודש ביי מלוה מלכה געוויזן מיט די האנט גענוי וואו די פיאות דארפן זיך ענדיגן אינמיטן פונעם מארדע(Chin), און קורצער פון דעם זאל עס נישט זיין, אבער אויך נישט לענגער ווי דעם. זאגענדיג אז דער זיידע הרה"ק מבאבוב זצ"ל האט גאר שטארק מקפיד געווען אויף דעם.
