נאך וואס די מצב הבריאות ביי כ"ק אדמו"ר מוויזניץ שליט"א וועלכער געפונט זיך אצינד אין לאס אנדזשעלעס לצרכי רפואה, האט זיך עטוואס סטאביליזירט מיטן אויבערשטנס הילף, איז נארוואס באשטעטיגט געווארן אז די קאמפליצירטע אפעראציע וואס דער רבי איז ערווארטעט אריבערצוגיין דארט אין לאס אנדזשעלעס שפיטאל, וועט פארקומען בעז"ה דעם קומענדיגן מאנטאג י"ז אדר, אין די צייט וואס טויזענטער אידן וועלן דאווענען לרפואתו השלימה.
דער רבי שליט"א איז ארויסגעפארן קיין לאס אנדזשעלעס מיט עטליכע וואכן צוריק, נאך וואס די ארטיגע דאקטוירים האבן באשטימט אדורכצופירן א קאמפליצירטע אפעראציע ארויסצושניידן די שעדליכע געוויקס וואס פלאגט דעם רבי'ן ל"ע די לעצטע פאר חדשים, און פאראורזאכט א גאר שווערע געזונט צושטאנד פארן רבי'ן מיט פארשידענע קאמפליקאציעס.
די האפענונג איז אז מיטן דורכפירן די קאמפליצירטע אפעראציע וועט זיך דער רבי קענען ערהוילן בסייעתא דשמיא, און צוביסלעך צוריקקומען צו די כוחות כבשנים קדמוניות, משפיע צו זיין פונדערנאנט אויף עדת צאן מרעיתו וכל הנלוים אליו.
נאך וואס דער רבי איז געווען זייער אפגעשוואכט די לעצטע פאר וואכן האט מען געמוזט אפשטופן די אפעראציע צוויי מאל, און אצינד איז ב"ה באשטימט געווארן אז דעם קומענדיגן מאנטאג פרשת ויקהל י"ז אדר וועט פארקומען די אפעראציע, און מטעם דעם רבינ'ס שטוב זענען די טויזענטער חסידים פארבעטן געווארן צו דאווענען און מעורר זיין רחמי שמים לרפואתו השלימה פונעם רבי'ן, און מקדיש זיין די קומענדיגע טעג לתורה ותפילה, תשובה ותיקון המעשים, און פעולות טובות לזכותו פונעם רבי'ן.
לויטן פלאן וועט דער רבי שליט"א שוין אריינגיין אין שפיטאל דעם פרייטאג ערב שבת בעצם יום הפורים, אין בעפארברייטונג צו די ערנסטע אפעראציע צו וואס מען דארף זיך צוגרייטן פון פאראויס. גבאי ועסקני בית וויזניץ איבער די גאנצע וועלט זענען עוסק אצינד אויסצוארבעטן די גענויע דעטאלן פון די צענדליגע מניני תהלים און עצרות תפילה וואס וועט פארקומען אין דעם גורל'דיגן טאג פון די אפעראציע, להעתיר בתפילה ותחנונים למען בריאתו השלימה פונעם רבי'ן שליט"א, כ"ק מרן ישראל בן לאה אסתר לרפואה שלימה.
